ગુજરાતમાં ચૂંટણીનો માહોલ જામ્યો છે ત્યારે મતદારોને રિઝવવા માટે થતી દારૂની હેરાફેરી પર પોલીસની કડક નજર છે. વડોદરા ગ્રામ્ય પોલીસની હદમાં આવતા ભાયલી વિસ્તારમાં સ્ટેટ મોનિટરિંગ સેલ (SMC) એ એક મોટી કાર્યવાહી કરી છે. બાતમીના આધારે પોલીસે એક ખેતરમાં દરોડો પાડીને વિદેશી દારૂના મોટા જથ્થાનું કટિંગ થતું રંગેહાથ ઝડપી પાડ્યું છે.
ખેતરમાં ચાલતું હતું 'કટિંગ'
SMC ની ટીમે જ્યારે દરોડો પાડ્યો ત્યારે બુટલેગરો ખેતરની ઓથમાં વિદેશી દારૂની પેટીઓ સગેવગે કરી રહ્યા હતા. આ કાર્યવાહી દરમિયાન પોલીસે કુખ્યાત બુટલેગર ગોરધન ઠાકોર અને સંજય પઢિયારની સ્થળ પરથી ધરપકડ કરી છે. પ્રાથમિક તપાસમાં બહાર આવ્યું છે કે આ દારૂનો જથ્થો રાજસ્થાનથી મંગાવવામાં આવ્યો હતો. આ સમગ્ર રેકેટમાં રાજસ્થાનથી દારૂ મોકલનાર મોહનસિંહ નામના શખ્સને પોલીસે વોન્ટેડ જાહેર કર્યો છે.
