સંસ્કારી નગરી વડોદરામાં માર્ગ અકસ્માતોનો સિલસિલો યથાવત રહ્યો છે. વડોદરા શહેરના વ્યસ્ત ગણાતા વાઘોડિયા રોડ પર આજે એક ગમખ્વાર અકસ્માત સર્જાયો હતો, જેમાં એક અજાણ્યા વૃદ્ધે પોતાનો જીવ ગુમાવ્યો છે. રસ્તો ક્રોસ કરી રહેલા વૃદ્ધને પૂરપાટ ઝડપે આવતા એક અજાણ્યા વાહને જોરદાર ટક્કર મારતા આ દુર્ઘટના સર્જાઈ હતી.
ઘટનાની વિગત
ઘટનાની મળતી માહિતી અનુસાર, વાઘોડિયા રોડ વિસ્તારમાં એક વૃદ્ધા વયના વ્યક્તિ રસ્તો ઓળંગી રહ્યા હતા. આ દરમિયાન અચાનક આવી ચઢેલા એક બેફામ વાહને વૃદ્ધને પોતાની અડફેટે લીધા હતા. ટક્કર એટલી જોરદાર હતી કે, વૃદ્ધ રોડ પર ફંગોળાયા હતા અને તેમને શરીરે તેમજ માથાના ભાગે ગંભીર ઈજાઓ પહોંચી હતી. અકસ્માત સર્જીને વાહન ચાલક ટક્કર મારીને વાહન સાથે ફરાર થઈ ગયો હોવાનું પ્રાથમિક દ્રષ્ટિએ જણાઈ રહ્યું છે.
સ્થાનિકોની મદદ અને હોસ્પિટલની કાર્યવાહી
અકસ્માતને પગલે આસપાસના લોકો અને રાહદારીઓ તાત્કાલિક ઘટના સ્થળે દોડી આવ્યા હતા. લોહીલુહાણ હાલતમાં વૃદ્ધને સારવાર માટે નજીકની હોસ્પિટલમાં ખસેડવામાં આવ્યા હતા. જોકે, હોસ્પિટલ પહોંચતા જ ફરજ પરના તબીબોએ તેમને તપાસીને મૃત જાહેર કર્યા હતા.
પોલીસ તપાસ શરૂ
બનાવની જાણ થતા જ સ્થાનિક પોલીસ કાફલો ઘટના સ્થળે પહોંચી ગયો હતો. પોલીસે મૃતક વૃદ્ધની ઓળખ મેળવવાની તજવીજ હાથ ધરી છે, કારણ કે તેમની પાસેથી કોઈ ઓળખપત્ર મળી આવ્યું નથી. આ સાથે જ પોલીસે હિટ એન્ડ રનનો ગુનો નોંધી, સીસીટીવી ફૂટેજના આધારે ફરાર વાહન ચાલકને ઝડપી પાડવા ચક્ર ગતિમાન કર્યા છે. વાઘોડિયા રોડ પર સતત વધતા ટ્રાફિક અને અકસ્માતોને લઈ સ્થાનિકોમાં પણ રોષ જોવા મળી રહ્યો છે.
આ પણ વાંચો - Vadodara: બીમારીથી કંટાળી SRP જવાનનો આપઘાત, પરિવાર બહાર ગયો ને ડ્રાઈવરએ ભર્યું અંતિમ પગલું
