મહેસાણા જિલ્લાના ખેડૂતો માટે ચિંતાજનક સમાચાર છે, કારણ કે નર્મદા કેનાલોની સફાઈ કામગીરીમાં આ વર્ષે ગંભીર વિલંબ થઈ રહ્યો છે. સામાન્ય રીતે, રવિ પાકની સિંચાઈ માટે પાણી છોડતા પહેલાં કેનાલોની સફાઈનું કામ સમયસર શરૂ થઈ જતું હોય છે. ગયા વર્ષે તો નવરાત્રી પહેલાં જ આ કામગીરી શરૂ થઈ ગઈ હતી, પરંતુ આ વર્ષે માઇનોર કેનાલોની સફાઈનું કામ પણ શરૂ થયું નથી, જેના કારણે ખેડૂતોની ચિંતામાં વધારો થયો છે. સફાઈમાં વિલંબ થવાથી સ્વાભાવિક રીતે જ નર્મદા કેનાલોમાં પાણી છોડવામાં પણ મોડું થશે.
નર્મદા વિભાગ ટેન્ડરિંગની પ્રક્રિયામાં વ્યસ્ત
કેનાલ સફાઈની કામગીરીમાં વિલંબ થવા પાછળનું મુખ્ય કારણ નર્મદા વિભાગની ધીમી કાર્યવાહી છે. સૂત્રોના જણાવ્યા અનુસાર, નર્મદા વિભાગ હાલમાં સફાઈ કામગીરી શરૂ કરવાને બદલે ટેન્ડરિંગની પ્રક્રિયામાં વ્યસ્ત છે. આ ટેન્ડરિંગ પ્રક્રિયા પૂર્ણ થયા પછી જ સફાઈનું વાસ્તવિક કામ શરૂ થશે, જેના કારણે પાણી છોડવામાં મોડું થવું લગભગ નિશ્ચિત છે. ખેડૂતોની આતુરતા અને જરૂરિયાતને ધ્યાનમાં રાખીને વિભાગે સમયસર સફાઈનું કામ શરૂ કરવું જોઈએ તેવી પ્રબળ માંગ ઊઠી છે.
