Mehsana અર્બન બેંકની ચૂંટણીમાં 48% મતદાન સાથે આક્ષેપ-પ્રત્યાક્ષેપ વચ્ચે મતદાન સંપન્ન

મહેસાણા અર્બન કો.ઓ. બેંકની પ્રતિષ્ઠાભરી ચૂંટણી માટે આજે શાંતિપૂર્ણ માહોલમાં મતદાન યોજાયું હતું. રાજકીય ગરમાવા અને આક્ષેપ-પ્રત્યાક્ષેપ વચ્ચે યોજાયેલી આ ચૂંટણીમાં અંદાજે 48 ટકા જેટલું સરેરાશ મતદાન નોંધાયું હતું. બેંકના 8 ડિરેક્ટરોની પસંદગી માટે આ ચૂંટણી યોજવામાં આવી હતી. આ ચૂંટણીમાં મુખ્યત્વે બે પેનલ - વિકાસ અને વિશ્વાસ વચ્ચે સીધો જંગ જોવા મળ્યો હતો. બંને પેનલ દ્વારા ચૂંટણી જીતવા માટે એડીચોટીનું જોર લગાવવામાં આવ્યું હતું.

કુલ 57 મતદાન કેન્દ્રો પર મતદાનની વ્યવસ્થા ગોઠવવમાં આવી

ચૂંટણી પ્રચાર દરમિયાન NPA એટલે કે નોન-પર્ફોર્મિંગ એસેટ અને ભ્રષ્ટાચારના મુદ્દાઓ મુખ્ય રહ્યા હતા. જેના પર ભારે આક્ષેપો અને પ્રત્યાક્ષેપો કરવામાં આવ્યા હતા. આ ચૂંટણીમાં મતદાન કરવાનોનો અધિકાર કુલ 1,07,762 મતદારોને હતો. આ ચૂંટણમાં 55 ગુજરાતની અને 2 મુંબઈની એમ કુલ 57 મતદાન કેન્દ્રો પર વ્યવસ્થા ગોઠવવમાં આવી હતી. જ્યાં સવારે 8 થી સાંજે 5 વાગ્યા સુધી મતદાનની વ્યવસ્થા કરવામાં આવી હતી.

આવતીકાલે સવારે મતગણતરી હાથ ધરવામાં આવશે

સવારથી જ મતદારોની લાંબી કતારો જોવા મળી હતી. જે મતદાન પ્રત્યેનો તેમનો ઉત્સાહ દર્શાવતો હતો. મતદાનની પ્રક્રિયા પૂર્ણ થયા બાદ હવે સૌની નજર આવતીકાલ પર છે. આવતીકાલે સવારે મતગણતરી હાથ ધરવામાં આવશે. જેના બાદ પરિણામો જાહેર થશે. આ પરિણામોથી નક્કી થશે કે મહેસાણા અર્બન બેંકનું સુકાન આગામી સમયમાં કઈ પેનલના હાથમાં આવશે.