આજે રાજ્યમાં સાર્વત્રિક ભારે વરસાદની આગાહી હવામાન વિભાગ દ્વારા કરવામાં આવી છે. જેમાં નર્મદા અને તાપી જિલ્લામાં વરસાદને લઈ રેડ એલર્ટ આપવામાં આવ્યું છે, તો અન્ય જિલ્લામાં વરસાદને લઈ યલો અને ઓરેન્જ એલર્ટ આપવામાં આવ્યું છે. આગામી સાત દિવસ હળવાથી મધ્યમ વરસાદની આગાહી કરવામાં આવી છે. વેલ માર્ક લો પ્રેશર, સાયક્લોનિક સર્ક્યુલેશન અને રાજયમાં મોન્સૂન ટ્રફના કારણે વરસાદની આગાહી કરવામાં આવી છે
આગામી ત્રણ દિવસ દક્ષિણ ગુજરાતમાં અતિભારે વરસાદની શક્યતાઓ
હવામાન વિભાગની આગાહી પ્રમાણે આગામી ત્રણ દિવસ દક્ષિણ ગુજરાતમાં અતિભારે વરસાદની શક્યતાઓ છે. આજે નર્મદા, છોટાઉદેપુર, ભરૂચમાં રેડ એલર્ટ જાહેર કરાયું છે. જ્યારે અમરેલીમાં અતિભારે વરસાદનું ઓરેન્જ એલર્ટ જાહેર કરાયું છે. આ ઉપરાંત ભાવનગર, વડોદરા, પંચમહાલ, દાહોદ, સુરત, તાપી, નવસારી, ડાંગ, વલસાડ, દમણમાં ભારે વરસાદનું ઓરેન્જ એલર્ટ અપાયું છે. ગીર સોમનાથમાં ભારે વરસાદનું યલો એલર્ટ, સાબરકાંઠા, અરવલ્લી, મહિસાગર, ખેડા, આણંદ, બોટાદ, રાજકોટ, અમદાવાદ અને ગાંધીનગરમાં ભારે વરસાદનું યલો એલર્ટ જાહેર કરાયું છે. આજે દક્ષિણ ગુજરાતના દરિયાકાંઠે LCS-3 લગાવ્યું છે.
