Dang Rain News: જિલ્લાની ચાર નદીઓમાં પુરની સ્થિતિ, સાપુતારામાં ધુમ્મસ છવાતા પ્રવાસીઓએ મજા માણી

ગુજરાતમાં ભારે વરસાદના કારણે અનેક વિસ્તારોમાં પાણી ભરાઈ જવાની સ્થિતિ સર્જાઈ છે. ત્યારે ડાંગ જિલ્લામાં વરસાદને કારણે કુદરતી સૌંદર્ય ખીલી ઉઠ્યું છે. જિલ્લાની મુખ્ય ચાર નદીઓમાં પૂરની સ્થિતિ છે. વરસાદને પગલે ગિરી મથક સાપુતારામાં ધુમ્મસભર્યુ વાતાવરણ સર્જાયું હતું. સાપુતારામાં પ્રવાસીઓએ વાતાવરણની મજા માણી હતી. ભારે વરસાદને કારણે અંબિકા, ગીરા, ખાપરી, પૂર્ણા નદી બે કાંઠે વહેતી થઈ છે.

નવસારીમાં પૂરની શકયતાઓ સેવાઈ રહી છે

ડાંગ જિલ્લામાં ભારે વરસાદને કારણે ચાર મુખ્ય નદીઓમા પુરની સ્થિતિ સર્જાઈ છે. જેમાં અંબિકા , ગીરા , ખાપરી અને પૂર્ણા નદીઓમાં પુર આવતા બે કાંઠે વહેતી થઈ છે. જિલ્લામાં સવારે 6 થી બપોરે 12 દરમિયાન વરસાદ નોંધાયો છે. જેમાં વઘઈમાં 1.31 અને સુબિરમાં 2.82 ઈંચ વરસાદ નોંધાયો છે. સુબિર તાલુકામાં વરસાદને પગલે નવસારીમાં પૂરની શકયતાઓ સેવાઈ રહી છે.

વરસાદને કારણે ધોધ અને ઝરણાં જીવંત થયાં

ડાંગ જિલ્લામાં હાલમાં વરસાદને કારણે ધોધ અને ઝરણાં જીવંત થયાં છે. ચોમાસાની રાહ જોઈને બેઠેલા પ્રવાસીઓનો ડાંગ જિલ્લામાં ઘસારો વધી રહ્યો છે. બીજી તરફ વઘઈ રોડ પર એક પ્રવાસીએ શિકારન શોધમાં નીકળેલા દીપડાનો વીડિયો વાયરલ કરતાં તંત્રએ પ્રવાસીઓને જંગલ વિસ્તારમાં કારમાંથી નીચે નહીં ઉતરવા અપીલ કરી છે. અંદાજે 100 મીટર ના ઊંચાઈથી પડતો ગીરમાળ ધોધ પ્રવાસીઓ માટે યાદગાર સંભારણું બની રહ્યું છે.