ગુજરાતમાં વરસાદની પરિસ્થિતિને લઈને હવામાન વિભાગ દ્વારા આગાહી કરવામાં આવી છે.આગામી દિવસોમાં રાજ્યના કેટલાક વિસ્તારોમાં ભારે વરસાદ પડી શકે છે.સૌરાષ્ટ્રના દરિયાકાંઠાના જિલ્લાઓ જેમ કે ગીર સોમનાથ, દીવ અને અમરેલીમાં ભારે વરસાદની સંભાવના છે.પૂર્વ સૌરાષ્ટ્રના ભાવનગર જિલ્લામાં પણ ભારે વરસાદનું યલો એલર્ટ આપવામાં આવ્યું છે. ત્યારે અમરેલીના રાજુલા અને જાફરાબાદમાં વીજળીના કડાકા ભડાકા સાથે ધોધમાર વરસાદ ખાબક્યો છે.
વીજળીના કડાકા ભડાકા સાથે ધોધમાર વરસાદ
અમરેલીના રાજુલા અને જાફરાબાદમાં વીજળીના કડાકા ભડાકા સાથે ધોધમાર વરસાદ ખાબક્યો છે. સતત વરસી રહેલા કમોસમી વરસાદને કારણે ખેડૂતો ચિંતામાં મુકાયા છે. ધોધમાર વરસાદને કારણે રસ્તા પર પાણી ફરી વળ્યાં છે. ખેતરમાં ઉભા પાકને મોટુ નુકસાન પહોંચ્યું છે. રાજુલામાં દરિયાકાંઠા વિસ્તારમાં ધોધમાર વરસાદ વરસ્યો છે. પીપાવાવ પોર્ટ અને ખાંભા તાલુકાના ગ્રામ્ય વિસ્તારોમાં પણ માવઠાની અસર વર્તાઈ છે. બગસરાના ગ્રામ્ય વિસ્તારમાં પણ વરસાદ વરસ્યો છે.
