દેવભૂમિ દ્વારકા જિલ્લામાં આવેલા ઓખા બંદર પર સતત બીજા દિવસે 3 નંબરનું ભયસૂચક સિગ્નલ યથાવત રાખવામાં આવ્યું છે. હવામાન વિભાગ દ્વારા વિસ્તારમાં ભારે વરસાદની આગાહી કરવામાં આવી છે અને દરિયામાં ભારે કરંટ તેમજ તોફાની પવન ફૂંકાવાની શક્યતા છે. આ ખતરાને ધ્યાનમાં રાખીને ગુજરાત મેરીટાઇમ બોર્ડ (GMB) દ્વારા તાત્કાલિક અસરથી આ સિગ્નલ લગાવવામાં આવ્યું છે. 3 નંબરનું સિગ્નલ સૂચવે છે કે બંદર પરથી માલસામાનનું વહન કરતી નાની હોડીઓ, બોટ અને જહાજોએ સાવચેત રહેવું અને શક્ય હોય તો બંદર પરથી પ્રસ્થાન ન કરવું.
માછીમારોને સ્પષ્ટ સૂચના
દરિયાઈ તોફાનના સંભવિત ખતરાને જોતાં વહીવટી તંત્ર દ્વારા માછીમારોને સ્પષ્ટ સૂચના આપવામાં આવી છે. તમામ માછીમાર ભાઈઓને દરિયો ન ખેડવા અને આગામી આદેશ ન મળે ત્યાં સુધી કિનારા પર જ રહેવા જણાવાયું છે. આ ઉપરાંત, દરિયામાં ગયેલી માછીમારીની તમામ બોટને સલામત સ્થળે લાંગરી દેવા માટે પણ નિર્દેશ આપવામાં આવ્યો છે. આ કડક પગલાં માછીમારોના જીવન અને તેમની માલમત્તાની સુરક્ષા માટે લેવામાં આવ્યા છે, જેથી કોઈપણ પ્રકારની જાનહાનિ ટાળી શકાય.
