મોરબી જિલ્લા માટે જીવાદોરી સમાન ગણાતો મચ્છુ-1 ડેમ ઉપરવાસમાં થયેલા ભારે વરસાદને કારણે ઓવરફ્લો થયો છે. ડેમ સંપૂર્ણપણે ભરાઈ જતાં વધારાનું પાણી મચ્છુ નદીમાં છોડવામાં આવી રહ્યું છે. આ પરિસ્થિતિને ધ્યાનમાં રાખીને, જિલ્લા વહીવટી તંત્ર દ્વારા તાત્કાલિક પગલાં ભરવામાં આવ્યા છે અને ડેમની આસપાસના નીચાણવાળા વિસ્તારોને એલર્ટ કરી દેવામાં આવ્યા છે. જાલસિકા, મહિકા, ગરિયા સહિત કુલ 24 ગામોને સાવધ રહેવાની સૂચના આપવામાં આવી છે. તંત્ર દ્વારા પરિસ્થિતિ પર સતત નજર રાખવામાં આવી રહી છે.
ડેમમાંથી પાણી છોડાતા રમણીય દ્રશ્યો
એક તરફ જ્યાં તંત્ર એલર્ટ છે, ત્યાં બીજી તરફ મચ્છુ-1 ડેમમાંથી પાણી છોડવામાં આવતા આહલાદક દ્રશ્યો સર્જાયા છે. ડેમના દરવાજા ખોલાતા ધસમસતા પ્રવાહ સાથે પાણી મચ્છુ નદીમાં વહી રહ્યું છે. આ દ્રશ્યોને નિહાળવા માટે મોટી સંખ્યામાં લોકો ડેમ સાઈટ પર ઉમટી રહ્યા છે. પાણીની આવક થતા આસપાસના વિસ્તારોમાં ખુશીનો માહોલ છે, કારણ કે આ પાણીનો સંગ્રહ સિંચાઈ અને પીવાના પાણી માટે ખૂબ જ ઉપયોગી સાબિત થશે. પ્રવાસીઓ અને સ્થાનિક લોકો માટે આ એક મનોરમ્ય દ્રશ્ય છે.
