સુરત શહેર, જે સ્વચ્છતા અને વિકાસ માટે જાણીતું છે, ત્યાં જ ચોમાસામાં રસ્તાઓની હાલત કેટલી કથળી ગઈ છે તેનો એક કિસ્સો સામે આવ્યો છે. શહેરના ડિંડોલી વિસ્તારમાં એક કટોકટીની પરિસ્થિતિમાં ઘટનાસ્થળે પહોંચવા જતી ફાયર બ્રિગેડની ઇમર્જન્સી ગાડી ખરાબ રોડ-રસ્તાને કારણે ખાડામાં ખૂંચી ગઈ હતી. આ ઘટનાથી મનપાની કામગીરી પર ગંભીર સવાલો ઊભા થયા છે અને લોકોમાં ભારે રોષ જોવા મળી રહ્યો છે. જો સમયસર ઇમરજન્સી ગાડી ઘટનાસ્થળે ન પહોંચી શકે તો કેવા ગંભીર પરિણામો આવી શકે છે તે આ ઘટના દર્શાવે છે.
મનપાના તંત્રની બેદરકારી અને ગંભીર પ્રશ્નો
એક તરફ, સુરત મનપા કરોડો રૂપિયાના ખર્ચે વિકાસના દાવા કરે છે, જ્યારે બીજી તરફ શહેરના મુખ્ય વિસ્તારોના રસ્તાઓ જર્જરિત અને ખાડાઓથી ભરેલા છે. આ ઘટના મનપાની આ બેદરકારીને ખુલ્લી પાડે છે. ઇમરજન્સી સેવાઓ માટેના વાહનો પણ જો રસ્તાઓની ખરાબ હાલતને કારણે ફસાઈ જાય, તો સામાન્ય નાગરિકોની શું હાલત થતી હશે તેનો વિચાર માત્ર જ ભય પમાડે છે. આ ઘટના પરથી સ્પષ્ટ થાય છે કે માત્ર બજેટ ફાળવવાથી નહીં, પરંતુ તેનો યોગ્ય અને સમયસર અમલ કરવાથી જ શહેરની મૂળભૂત સુવિધાઓ સુધરી શકે છે.
સુરત શહેરમાં બિસ્માર રસ્તાઓની હકીકત
આ એક માત્ર કિસ્સો નથી. સુરત શહેરમાં ચોમાસા દરમિયાન અનેક રસ્તાઓ ખરાબ હાલતમાં જોવા મળે છે. ઠેર ઠેર પડેલા ખાડાઓ વાહનચાલકો માટે જોખમ ઊભું કરે છે અને અકસ્માતોનું કારણ બને છે. જો મનપા દ્વારા ચોમાસા પહેલાં જ રસ્તાઓની મરામત અને યોગ્ય દેખરેખ રાખવામાં આવી હોત તો આવી પરિસ્થિતિનું નિર્માણ થાત જ નહીં. આ ઘટના મનપા માટે એક લાલબત્તી સમાન છે કે તેમણે માત્ર વિકાસના દાવા કરવાને બદલે પાયાની સુવિધાઓ પર ધ્યાન આપવું અત્યંત જરૂરી છે.
