રાજ્યમાં છેલ્લા કેટલાક દિવસથી થઈ રહેલા ભારે વરસાદની સ્થિતિને લઈને રાજ્ય સરકારના મંત્રી મુકેશ પટેલે એક નિવેદન આપ્યું છે. તેમણે જણાવ્યું કે, ગુજરાતમાં વરસાદની પદ્ધતિમાં ફેરફાર જોવા મળ્યો છે અને ક્યારેક કેટલીક જગ્યાએ અમાન્ય વરસાદ પણ પડે છે. તેમણે ઉમેર્યું કે, ગુજરાત તેમજ તેની આસપાસના રાજ્યોમાં પણ ખૂબ જ વરસાદ પડ્યો છે, જેને કારણે ગુજરાતના અનેક વિસ્તારોમાં તેની અસર જોવા મળી છે. આ પરિસ્થિતિને ધ્યાનમાં રાખીને ડિઝાસ્ટર મેનેજમેન્ટ વિભાગને એલર્ટ રહેવા સૂચના આપવામાં આવી છે.
ઉકાઈ ડેમ અને તાપી નદીની સ્થિતિ
મંત્રી મુકેશ પટેલે તાપી નદી અને ઉકાઈ ડેમની વર્તમાન સ્થિતિ વિશે પણ માહિતી આપી હતી. તેમણે જણાવ્યું કે, હાલ ઉકાઈ ડેમમાંથી સતત 1.89 લાખ ક્યુસેક પાણીની આવક થઈ રહી છે, જ્યારે તાપી નદીમાં 1.63 લાખ ક્યુસેક પાણીની જાવક છે. પાણીનું સ્તર જાળવી રાખવા અને કોઈ અનિચ્છનીય ઘટના ન બને તે માટે નિષ્ણાતોની એક ટીમ સતત એલર્ટ પર છે. આ ઉપરાંત, જરૂર પડ્યે તાત્કાલિક કાર્યવાહી કરી શકાય તે માટે NDRF (નેશનલ ડિઝાસ્ટર રિસ્પોન્સ ફોર્સ) સહિતની ટીમોને પણ સ્ટેન્ડ બાય રાખવામાં આવી છે.
