નડિયાદમાં ઉત્તરાયણનો તહેવાર આવવામાં હજુ બે મહિનાની વાર છે ત્યાં જ પ્રતિબંધિત ચાઇનીઝ દોરીએ શહેરમાં કહેર વર્તાવવાનું શરૂ કરી દીધું છે. તાજેતરમાં નડિયાદ શહેરના વૈશાલી સિનેમા રોડ પર એક ગંભીર અકસ્માત થયો હતો. જેમાં ટુ-વ્હીલર પર જઈ રહેલી કોલેજની એક યુવતીનું ગળું ચાઇનીઝ દોરીથી કપાઈ ગયું હતું. કોલેજના પ્રથમ વર્ષમાં અભ્યાસ કરતી મનીષા મારવાડી નામની આ યુવતી વૈશાલી સિનેમા રોડ પરથી પસાર થઈ રહી હતી.
વૈશાલી સિનેમા રોડ પર જતી યુવતી સાથે બન્યો બનાવ
તે જ સમયે અચાનક તેના ગળામાં પ્રતિબંધિત ચાઇનીઝ દોરી આવી જતાં તે લોહીલુહાણ થઈ ગઈ હતી. સદ્નસીબે તેની સાથે રહેલી મિત્રએ તાત્કાલિક સમજદારી વાપરી અને મનીષાને સિવિલ હોસ્પિટલ પહોંચાડી હતી. હોસ્પિટલમાં ENT ડોક્ટરે તરત જ તેની સારવાર શરૂ કરી દીધી હતી. જેના કારણે યુવતીનો જીવ બચી ગયો હતો. તાત્કાલિક અને યોગ્ય સારવાર મળી જવાથી એક મોટી દુર્ઘટના ટળી હતી. જોકે આ ઘટનાએ ફરી એકવાર ચાઇનીઝ દોરીના જોખમ અને તેના પરના પ્રતિબંધના અમલ સામે સવાલો ઊભા કર્યા છે.
