Nadiad News : 80 વર્ષ જૂની પ્રભાત સિનેમાની દીવાલ ધરાશાયી, સદનસીબે કોઈ જાનહાની નહીં

નડિયાદ શહેરના બજારની વચ્ચોવચ આવેલું અને 80 વર્ષથી પણ વધુ જૂનું પ્રભાત સિનેમા આજે સવારે અચાનક ધરાશાયી થતા દોડધામ મચી ગઈ હતી. સિનેમા હોલની એક દીવાલ એકએક તૂટી પડતાં નીચે પાર્ક કરેલા બે ટુ-વ્હીલરને નુકસાન થયું હતું. સદનસીબે આ ઘટનામાં કોઈ જાનહાની થઇ નથી પરંતુ આસપાસના વિસ્તારમાં ભયનો માહોલ છવાયો છે.

સ્થાનિકોમાં ગભરાટ

તમને જણાવી દઈએ કે, પ્રભાત સિનેમાનું સમગ્ર બાંધકામ અત્યંત જર્જરિત હાલતમાં છે. આજે સવારે દીવાલનો મોટો હિસ્સો તૂટી પડતાં આસપાસના લોકોમાં ગભરાટ ફેલાઈ ગયો હતો. આ વિસ્તારમાં બે સમાજના મોટા ફળિયા આવેલા છે અને લોકોની અવર જવર સતત રહે છે ત્યારે આ ઘટનામાં કોઈ મોટી દુર્ઘટના ટળતા સૌએ રાહતનો શ્વાસ લીધો હતો.

વિસ્તાર અવર જવર માટે બંધ કરાયો

દીવાલનો હિસ્સો પડવાને કારણે તે વિસ્તારમાં અવર જવર બંધ કરી દેવામાં આવી હતી. આસપાસની દુકાનો અને રહેણાંક વિસ્તારના લોકોમાં આ ઘટનાને પગલે ભય છે. સ્થાનિકોનું કહેવું છે કે, આ વર્ષો જૂના બાંધકામમાં હજુ પણ અનેક જગ્યાએ મોટી તિરાડો જોવા મળે છે અને તેનું મોટાભાગનું માળખું અત્યંત જર્જરિત થઇ ગયું છે. સ્થાનિક નાગરિકો દ્વારા નડિયાદ નગરપાલિકાને આ સંદર્ભે તત્કાલ યોગ્ય નિરાકરણ લાવવા અને આખેઆખું જર્જરિત બિલ્ડિંગ ઉતારી લેવા માટે પ્રબળ માંગ કરવામાં આવી છે. ભવિષ્યમાં કોઈ મોટી દુર્ઘટના ન બને તે માટે વહેલી તકે પગલાં લેવાય તે અત્યંત જરૂરી છે.