Navsariના શાકમાર્કેટમાં લારી મૂકવા બાબતે થયો ઝઘડો, બે લારીવાળા વચ્ચે છુટ્ટા હાથની મારામારી

નવસારી શહેરના શાકમાર્કેટમાં આજે એક સામાન્ય બાબતે ઉગ્ર મારામારીની ઘટના બની હતી. જેમાં એક યુવકને ઢોર માર મારવામાં આવતા તેને ગંભીર ઈજાઓ પહોંચી હતી. આ ઘટના બાદ મામલો પોલીસ સ્ટેશન સુધી પહોંચ્યો હતો. આ ઘટના શાકભાજી માર્કેટમાં બની હતી. જ્યાં લારીવાળાઓ વચ્ચે લારી મૂકવા બાબતે ઝઘડો થયો હતો. આ ઝઘડાએ જોતજોતામાં ઉગ્ર સ્વરૂપ ધારણ કરી લીધું હતું અને મારામારી શરૂ થઈ ગઈ હતી.

શાકમાર્કેટમાં લારીવાળા વચ્ચે મારામારી

એક યુવક જે ફળની લારી ચલાવે છે તેને અન્ય લારીવાળા દ્વારા લાકડાના ફટકા વડે બેફામ માર મારવામાં આવ્યો હતો. હુમલાખોરોએ તેને એટલી હદે માર્યો હતો કે તે લોહીલુહાણ થઈ ગયો હતો. માર્કેટમાં મારામારી થતા થોડા સમય માટે અફરાતફરીનો માહોલ સર્જાયો હતો. આસપાસના અન્ય વેપારીઓ અને ગ્રાહકોએ દખલગીરી કરીને ઝઘડાને શાંત પાડ્યો હતો. ઈજાગ્રસ્ત યુવકને તાત્કાલિક સારવાર માટે હોસ્પિટલ ખસેડવામાં આવ્યો હતો.

ફળની લારી ચલાવતા યુવાનને ઢોર માર

આ ઘટના બાદ ઈજાગ્રસ્ત યુવકે પોલીસ સ્ટેશનમાં ફરિયાદ નોંધાવી હતી. પોલીસે ગુનો નોંધીને વધુ તપાસ હાથ ધરી હતી અને આરોપીઓને પકડવા માટેના પ્રયાસો શરૂ કર્યા હતા. શાકમાર્કેટ જેવા જાહેર સ્થળે આ પ્રકારની મારામારીની ઘટના બનતા નાના વેપારીઓમાં ભયનો માહોલ ફેલાયો હતો. પોલીસે બજારમાં શાંતિ અને વ્યવસ્થા જળવાઈ રહે તે માટે જરૂરી પગલાં લેવા જોઈએ તેવી વેપારીઓ દ્વારા માગ કરવામાં આવી રહી છે.