Panchmahalમાં સ્પોર્ટ્સ કોમ્પ્લેક્સમાં 25 ફૂટ ઉપર બંધાયેલી પાલખ તૂટી પડતાં 3 શ્રમિકો થયા ઈજાગ્રસ્ત

પંચમહાલ જિલ્લાના હાલોલ-પાવાગઢ રોડ પર આવેલા એક સ્પોર્ટ્સ કોમ્પ્લેક્સમાં આજે એક દુર્ઘટના બની હતી. જેમાં પાલખ તૂટી પડવાને કારણે ત્રણ શ્રમિકો ગંભીર રીતે ઘાયલ થયા હતા. ઘાયલ થયેલા શ્રમિકો પૈકી બેની હાલત અત્યંત ગંભીર હોવાથી તેમને વધુ સારવાર માટે વડોદરા ખસેડવામાં આવ્યા હતા. સ્પોર્ટ્સ કોમ્પ્લેક્સના નિર્માણ કાર્યમાં શ્રમિકો પ્લાસ્ટર કરવા માટે એક પાલખ પર કામ કરી રહ્યા હતા તે સમયે આ દુર્ઘટના બની હતી.

પ્લાસ્ટર માટે બનાવેલી પાલખ તૂટતા 3 ઘાયલ

અચાનક આ પાલખ 25 ફૂટની ઊંચાઈએથી ધરાશાયી થઈ હતી. પાલખ તૂટી પડતા તેના પર કામ કરી રહેલા ત્રણ શ્રમિકો નીચે પટકાયા હતા. ઘટના બાદ તાત્કાલિક અન્ય શ્રમિકો અને સ્થાનિક લોકો દ્વારા બચાવ કામગીરી હાથ ધરવામાં આવી હતી. ઘાયલ થયેલા ત્રણેય શ્રમિકોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા હતા. જોકે ત્રણ પૈકી બે શ્રમિકોને ગંભીર ઈજાઓ પહોંચી હોવાથી તેમને વધુ સારવાર માટે વડોદરા લઈ જવામાં આવ્યા હતા.

ઇજાગ્રસ્તોને સારવાર માટે હોસ્પિટલ ખસેડાયા

આ ઘટનાએ બાંધકામ સ્થળોએ શ્રમિકોની સુરક્ષા અંગે ગંભીર સવાલો ઉભા કર્યા છે. યોગ્ય સુરક્ષા ઉપકરણો અને નિયમોનું પાલન ન થવાને કારણે આ પ્રકારની દુર્ઘટનાઓ બનતી હોય છે. આ મામલે પોલીસ અને સંબંધિત વિભાગ દ્વારા તપાસ હાથ ધરવામાં આવી છે કે શું આ દુર્ઘટના સલામતીના નિયમોના ભંગને કારણે બની છે કે કેમ. આ ઘટના બાદ અન્ય શ્રમિકોમાં પણ ભયનો માહોલ જોવા મળ્યો હતો.