Porbandarમાં મેઘરાજાનું રોદ્ર સ્વરૂપ, તોફાની પવનના સુસવાટા સાથે વરસાદ વરસતા વિશાળકાય વૃક્ષ થયું ધરાશાયી

પોરબંદરમાં આજે સાંજે વાતાવરણમાં અચાનક પલટો આવ્યો હતો અને ભારે પવન સાથે ધોધમાર વરસાદ શરૂ થયો હતો. મેઘરાજાના આ રોદ્ર સ્વરૂપને કારણે શહેરના પેરેડાઈઝ ફુવારા નજીક એક વિશાળ વૃક્ષ ધરાશાયી થયું હતું. આ ઘટનામાં બે લોકો ઇજાગ્રસ્ત થયા હતા. જેમને તાત્કાલિક સારવાર માટે હોસ્પિટલ ખસેડવામાં આવ્યા હતા. તોફાની પવનના સુસવાટા એટલા તેજ હતા કે પેરેડાઈઝ ફુવારા પાસે આવેલું એક મોટું વૃક્ષ મૂળમાંથી ઉખડીને રસ્તા પર પડ્યું હતું. આ સમયે ત્યાંથી પસાર થઈ રહેલા બે લોકો આ વૃક્ષની નીચે આવી ગયા હતા.

પેરેડાઇઝ ફુવારા નજીક ભારે પવનથી વૃક્ષ ધરાશાયી

વૃક્ષ પડતા જ આસપાસના લોકો મદદ માટે દોડી આવ્યા હતા અને ઇજાગ્રસ્તોને બહાર કાઢવામાં આવ્યા હતા. ઇજાગ્રસ્તોને તાત્કાલિક સારવાર માટે પોરબંદરની સરકારી ભાવસિંહજી હોસ્પિટલમાં ખસેડવામાં આવ્યા હતા. સદનસીબે આ દુર્ઘટનામાં કોઈ મોટી જાનહાનિ થઈ નથી. ઘટનાની જાણ થતા જ પોરબંદર ફાયર બ્રિગેડની ટીમ તાત્કાલિક સ્થળ પર પહોંચી ગઈ હતી અને રસ્તા પર પડેલા વૃક્ષને હટાવવાની કામગીરી શરૂ કરી હતી. આ કામગીરીને કારણે રસ્તા પરનો વાહનવ્યવહાર પણ થોડા સમય માટે ખોરવાયો હતો.

પોરબંદર ફાયર બ્રિગેડ દ્વારા વૃક્ષ હટાવવાની કામગીરી શરૂ.

આ ઘટનાએ ફરી એકવાર ભારે પવન અને વરસાદ દરમિયાન સાવચેતી રાખવાની જરૂરિયાત પર ભાર મૂક્યો હતો. શહેરમાં ઘણા જૂના અને નબળા વૃક્ષો છે. જે આવા તોફાની પવનમાં પડી શકે છે. તંત્ર દ્વારા આવા જોખમી વૃક્ષોને ઓળખીને તેને હટાવવા માટે પગલાં લેવા જોઈએ તેવી માંગણી ઉઠી છે. જેથી ભવિષ્યમાં આવા અકસ્માતોને ટાળી શકાય.