રાજકોટ શહેરમાં છેલ્લા કેટલાય દિવસોથી પડી રહેલી અસહ્ય ગરમી અને અકળાવનારા ઉકળાટથી લોકો તોબા પોકારી ઉઠ્યા હતા. આ કાળઝાળ ગરમી વચ્ચે આજે અચાનક વાતાવરણમાં પલટો આવ્યો હતો અને આકાશ કાળાડિબાંગ વાદળોથી ઘેરાઈ ગયું હતું. બપોર બાદ શહેરમાં પવનના સુસવાટા સાથે વરસાદી ઝાપટું તૂટી પડ્યું હતું. આ પ્રારંભિક વરસાદના પગલે વાતાવરણમાં એકાએક ઠંડક પ્રસરી ગઈ હતી, જેને કારણે લાંબા સમયથી બફારાનો સામનો કરી રહેલા રાજકોટવાસીઓએ મોટી રાહત અનુભવી છે.
લીમડા ચોક, 150 ફૂટ રિંગ રોડ અને રેસકોર્ષમાં વરસાદી માહોલ
મેઘરાજાના આ ધમાકેદાર આગમનથી શહેરના મુખ્ય માર્ગો ભીના થઈ ગયા હતા. રાજકોટના હાર્દ સમાન લીમડા ચોક, મોટી ટાંકી ચોક, સર્કિટ હાઉસ અને 150 ફૂટ રિંગ રોડ જેવા વ્યસ્ત વિસ્તારોમાં જોરદાર વરસાદી ઝાપટું પડ્યું હતું. આ ઉપરાંત, શહેરના પ્રખ્યાત રેસકોર્ષ વિસ્તારમાં પણ વરસાદી ઝાપટાં પડતાં વોકિંગ અને મનોરંજન માટે આવેલા લોકો રોમાંચિત થઈ ઉઠ્યા હતા. અચાનક શરૂ થયેલા વરસાદના કારણે રોડ પરથી પસાર થતા વાહનચાલકો ઓથ શોધતા નજરે પડ્યા હતા.
