Rajkotના ભક્તિનગર પ્લોટમાં ટુ-વ્હીલર અથડાતાં બોલાચાલી બાદ મારામારી

Rajkotના ભક્તિનગર પ્લોટમાં ટુ-વ્હીલર અથડાતાં બોલાચાલી બાદ મારામારી

રાજકોટ શહેરના ભક્તિનગર પ્લોટ વિસ્તારમાંથી જાહેર રસ્તા પર મારામારીની એક ચોંકાવનારી ઘટના સામે આવી છે. મળતી માહિતી મુજબ, આ વિસ્તારમાં એક બાઇક અને એક્ટિવા વચ્ચે સામાન્ય અકસ્માત સર્જાયો હતો. આ ટુ-વ્હીલર પરસ્પર અથડાતાં જ બંને ચાલકો વચ્ચે ઘટનાસ્થળે જ ઉગ્ર માથાકૂટ અને બોલાચાલી શરૂ થઈ ગઈ હતી. વિવાદ એટલો વધી ગયો હતો કે એક્ટિવા ચાલકે પોતાનો પીતો ગુમાવ્યો હતો અને વાત ગાળાગાળીથી વધીને સીધી મારામારી પર પહોંચી ગઈ હતી.

મારામારીના લાઈવ દ્રશ્યો સીસીટીવી કેમેરામાં કેદ

ટુ-વ્હીલર અથડાયા બાદ બંને પક્ષો વચ્ચે થયેલી આ હિંસક ઝપાઝપી અને મારામારીની સમગ્ર ઘટના ત્યાં નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે. સીસીટીવી ફૂટેજમાં જોઈ શકાય છે કે કઈ રીતે સામાન્ય અકસ્માત જેવી બાબતમાં ઉશ્કેરાઈને કાયદો હાથમાં લેવામાં આવ્યો હતો. આ વિડીયો સોશિયલ મીડિયા પર સામે આવ્યા બાદ શહેરમાં કાયદો અને વ્યવસ્થા તેમજ વાહનચાલકોની વધતી અસહિષ્ણુતા અંગે સ્થાનિક લોકોમાં ચર્ચા જાગી છે.

પોલીસે એક્ટિવા ચાલકની કરી અટકાયત

આ ઘટના અંગેની જાણ આસપાસના લોકોએ તાત્કાલિક પોલીસને કરી હતી. જાહેર રસ્તા પર ન્યુસન્સ ઉભું કરવા અને મારામારી કરવાના આ મામલાને ગંભીરતાથી લઈને ભક્તિનગર પોલીસે તુરંત કાર્યવાહી હાથ ધરી છે. સીસીટીવી ફૂટેજ અને સ્થાનિક લોકોની પૂછપરછના આધારે પોલીસે ગુનો નોંધીને કાયદો હાથમાં લેનારા એક્ટિવા ચાલકને તાત્કાલિક અસરથી ઝડપી પાડી તેની અટકાયત કરી લીધી છે. પોલીસે આ મામલે આગળની કાનૂની તપાસ અને કાર્યવાહી તેજ કરી છે.

ગુજરાતના વધુ સમાચાર વાંચવા માટે ક્લિક કરો