Sanand News: દારૂની મહેફિલમાં પકડાયેલા ભાજપના નેતાઓના પુત્ર અને સગાઓને છોડી મુકાયા, 100માંથી માત્ર 39 સામે જ ફરિયાદ નોંધાઈ

ગુજરાતમાં આમ તો દારૂબંધી છે પરંતુ જાણે કે દારૂની નદીઓ વહેતી હોય તે પ્રમાણે રોજબરોજ રાજ્યમાં પ્રોહીબિશનના કેસોમાં વધારો થઈ રહ્યો છે.અમદાવાદ જિલ્લાના સાણંદમાં આવેલા બે અલગ અલગ રિસોર્ટમાં દારૂની મહેફીલ પોલીસ દ્વારા પકડી પાડવામાં આવી છે.દારૂની પાર્ટી કરી રહેલા યુવક યુવતીઓ વિરુદ્ધ પોલીસે કાર્યવાહી કરી છે.છેલ્લા બે દિવસમાં ગ્રામ્ય પોલીસ દ્વારા અલગ અલગ રિસોર્ટમાં રેડ કરી મોટી સંખ્યામાં દારૂના નશામાં રહેલા યુવક યુવતીઓ વિરુદ્ધ કાર્યવાહી કરી છે. પોલીસની કાર્યવાહી સામે અનેક સવાલો ઉભા થયાં છે.

100 નબીરાઓમાંથી માત્ર 39 લોકો સામે જ ફરિયાદ નોંધી

પોલીસે સાણંદમાં યોજાયેલી દારુ પાર્ટીમાં રેડ કરી હતી. તેમાં 100 નબીરાઓમાંથી માત્ર 39 લોકો સામે જ ફરિયાદ નોંધી છે. દારૂની મહેફિલમાં ભાજપના નેતાઓના પુત્ર અને સગાઓ સહિત ભાજપના ધારાસભ્યનો ભત્રીજો પણ હતો. પોલીસે આ લોકોને દબાણના કારણે છોડી મુક્યા હોવાનું જાણવા મળ્યું છે. આ મહેફિલમાં મહેફિલમાં કોંગ્રેસમાંથી ભાજપમાં આવનાર મોટા નેતાનો પુત્ર પણ હતો. પોલીસે સામાન્ય કલમો લગાવીને નબીરાઓને છટકબારી કરી આપી હતી.

માત્ર બ્રેથ એનેલાઇઝર ટેસ્ટના ભરોસે છોડી મુક્યા

પોલીસે રેડ કર્યા બાદ 40થી વધુ યુવક અને યુવતીઓને માત્ર બ્રેથ એનેલાઇઝર ટેસ્ટના ભરોસે છોડી મુક્યા હતાં. આ લોકોએ અન્ય કોઇ નશો કર્યો છે કે નહી તેની પોલીસે તપાસ ન પણ ન કરી નહોતી. પોલીસે ગઈ કાલે સાણંદમાં ગ્લેડ વન રિસોર્ટમાં મહેફિલ પર દરોડા પાડ્યા હતાં. આ ઉપરાંત સાણંદ પોલીસ દ્વારા ગઈકાલે કલહાર ગ્રીન્સ રિસોર્ટમાં આવેલા એક બંગલામાં દારૂ પાર્ટી ચાલતી હોવાની માહિતીના આધારે રેડ કરતા 12 યુવકોની ધરપકડ કરી હતી.