Suratના ધારાસભ્યના 'સ્માર્ટ બાંકડા' રાજકોટના જસદણમાં પહોંચી ગયા, ફોટો સોશિયલ મીડિયામાં વાયરલ

સ્માર્ટ સિટી સુરતમાં એક નવો ચોંકાવનારો વિવાદ સામે આવ્યો છે. સુરતના ધારાસભ્યની ગ્રાન્ટમાંથી ફાળવેલા બાંકડાઓ છેક રાજકોટ પહોંચી ગયા છે. કામરેજના ધારાસભ્ય પ્રફુલ પાનસેરીયા અને બારડોલીના સાંસદ પ્રભુ વસાવાની ગ્રાન્ટના બાકડા જસદણ પહોંચી ગયા છે. સુરતમાં આમ આદમી પાર્ટીના કોર્પોરેટર વિપુલ સુહાગિયાએ કેટલાક ફોટો સોશિયલ મીડિયામાં વાયરલ કરી આ ચર્ચા જગાવી છે.

સુરતના બાંકડા રાજકોટ પહોંચ્યા

વોર્ડ 17ની ચૂંટણી લડેલા ભાજપના ઉમેદવાર ભરત વાળદોરીયાએ બાકડા પોતાના વતન જસદણના પીપળીયામાં મોકલાવ્યા છે. સાથે જ જસદણના ધારાસભ્ય બાંકડા ન આપતા હોવાની પણ કોમેન્ટ કરી છે. સુરતમાં કોર્પોરેટરે આપેલા બાંકડાનો દુરુપયોગ થતો હોવાના અનેક કિસ્સા સામે આવ્યા છે ત્યારે વધુ એક કિસ્સો બહાર આવ્યો છે. કોર્પોરેટરે કહ્યું કે સુરતની જનતાના ટેક્સના પૈસાના બાંકડા આ રીતે બહાર જવા જોઈએ નહીં. એક જવાબદાર વ્યક્તિ તરીકે બાકળા મોકલનાર વ્યક્તિને આવું શોભતું નથી. પંચાયતથી લઈને પાર્લામેન્ટ સુધી ભાજપનું શાસન છે તો જસદણમાં પણ જનપ્રતિનિધિઓએ બાંકડા આપવા જોઈએ.

વિપક્ષી કોર્પોરેટરે બાંકડાના ફોટો વાયરલ કર્યા 

સુરતના ધારાસભ્યની ગ્રાન્ટમાંથી ફાળવેલા બાંકડાઓ રાજકોટ પહોંચી ગયા હોવાના આક્ષેપ સાથે વિપક્ષી કોર્પોરેટરે બાંકડાના ફોટો વાયરલ કર્યા છે. વિપક્ષ દ્વારા આક્ષેપ કરવામાં આવ્યો છે કે ભાજપમાંથી પાલિકાની ચૂંટણી લડી ચૂકેલા ઉમેદવાર બાંકડા ગામડે લઈ ગયા છે. જેના પગલે સુરતના સ્માર્ટ બાંકડા રાજકોટમાં કઈ રીતે પહોંચ્યા તે અંગે ચર્ચા જગાવી છે.