સુરતની વીર નર્મદ દક્ષિણ ગુજરાત યુનિવર્સિટી (VNSGU) ફરી એકવાર વિવાદના ચકડોળે ચઢી છે. આ વખતે હોબાળાનું કારણ યુનિવર્સિટીની હોસ્ટેલમાં આપવામાં આવતા ભોજનની ખરાબ ગુણવત્તા છે. હોસ્ટેલમાં રહેતા વિદ્યાર્થીઓએ ભોજનની ગુણવત્તા અંગે વારંવાર સત્તાધીશો સમક્ષ રજૂઆતો કરી હોવા છતાં, કોઈ જ નક્કર નિરાકરણ ન આવતાં વિદ્યાર્થીઓનો રોષ ભભૂકી ઉઠ્યો હતો. શનિવારે વિદ્યાર્થીઓના જૂથે ભેગા મળીને યુનિવર્સિટી પરિસરમાં ઉગ્ર હોબાળો મચાવ્યો હતો. આ વિદ્યાર્થીઓએ જોરદાર નારેબાજી કરી પોતાનો આક્રોશ વ્યક્ત કર્યો હતો, જેના પગલે યુનિવર્સિટી કેમ્પસમાં થોડા સમય માટે તણાવપૂર્ણ સ્થિતિ સર્જાઈ હતી.
હોબાળાને પગલે સમાજ કલ્યાણ અધિકારી દોડી આવ્યા
વિદ્યાર્થીઓ દ્વારા કરવામાં આવેલો ઉગ્ર હોબાળો અને નારેબાજી એટલી પ્રબળ હતી કે, સમગ્ર મામલો યુનિવર્સિટી સત્તાધીશોની સાથે સાથે જિલ્લા વહીવટી તંત્ર સુધી પણ પહોંચ્યો હતો. પરિસ્થિતિની ગંભીરતાને ધ્યાનમાં રાખીને, તાત્કાલિક સમાજ કલ્યાણ અધિકારી ઘટનાસ્થળે દોડી આવ્યા હતા. અધિકારીઓએ વિરોધ કરી રહેલા વિદ્યાર્થીઓ સાથે વાતચીત કરીને તેમની ફરિયાદો સાંભળી હતી અને પરિસ્થિતિને થાળે પાડવાનો પ્રયાસ કર્યો હતો. વિદ્યાર્થીઓએ અધિકારી સમક્ષ પણ પોતાની રજૂઆતો જણાવી હતી કે ભોજનની ખરાબ ગુણવત્તાને કારણે તેમને મુશ્કેલી પડી રહી છે અને તેમની શૈક્ષણિક પ્રવૃત્તિઓ પર પણ અસર પડી રહી છે.
