સુરતના ડિંડોલી વિસ્તારમાંથી આઘાતજનક અને કાળજું કંપાવી દેનારી ઘટના સામે આવી છે. અહીં એક બેફામ સ્પીડે આવી રહેલી કારના ચાલકે ઘર આંગણે રમી રહેલી માત્ર 5 વર્ષની માસૂમ બાળકીને અડફેટે લઈને કચડી નાખી છે. આ ભયાનક અકસ્માતમાં ગંભીર ઇજાઓ થવાના કારણે માસૂમ બાળકીનું ઘટનાસ્થળે જ કરુણ મોત નીપજ્યું છે. આ ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને પરિવારમાં માતમનો માહોલ છવાયો છે.
બાળકી ઘરની બહાર રમી રહી હતી
મળતી માહિતી મુજબ, ડિંડોલીની એક સોસાયટીમાં 5 વર્ષની માસૂમ બાળકી પોતાના ઘરની બહાર શાંતિથી રમી રહી હતી. આ દરમિયાન સોસાયટીમાં જ રહેતા નીતિન મિશ્રા નામના કાર ચાલકે પોતાની કાર ફૂલ ઝડપે અને ગફલતભરી રીતે હંકારી આવી બાળકી પર ચડાવી દીધી હતી.
