Surat News: ઓલપાડની સીવાણ ગ્રામ પંચાયતમાં ACBની ટ્રેપ: તલાટી અને કોમ્પ્યુટર ઓપરેટર લાંચ લેતા ઝડપાયા

સુરતના ઓલપાડ તાલુકાની સીવાણ ગ્રામ પંચાયત ખાતે એન્ટી કરપ્શન બ્યુરો (ACB) એ એક ટ્રેપ ગોઠવી, જેમાં તલાટી-કમ-મંત્રી અને કોમ્પ્યુટર ઓપરેટર લાંચ લેતા રંગે હાથે ઝડપાયા. તલાટી ભરત ચૌધરી અને કોમ્પ્યુટર ઓપરેટર પ્રગતિ પટેલે ઘરના બાંધકામની આકારણી કાઢી આપવા માટે ₹7,000ની લાંચ માંગી હતી.

તલાટી અને કોમ્પ્યુટર ઓપરેટર ACBના સકંજામાં

આ અંગેની ફરિયાદ મળતા, ACBની ટીમે આ બંનેને લાંચ લેતા ઝડપી પાડ્યા. તલાટી ભરત ચૌધરી સીવાણ ગામના નાગરિકોને સરકારી કામ માટે અવારનવાર કનડગત કરતા હતા અને ગ્રામ પંચાયતના કોઈપણ કામ માટે પૈસાની માગણી કરતા હતા. ગામલોકોને આવકના દાખલા, જાતિના દાખલા, રહેઠાણના દાખલા, ઘરની આકારણી, પ્રોપર્ટી ટેક્સ, 7/12, 8-અ ના ઉતારા જેવા અનેક કામો માટે તેમની જરૂર પડતી હોવાથી તેઓ તેનો લાભ ઉઠાવતા હતા. ACBની આ કાર્યવાહીથી આવા ભ્રષ્ટ કર્મચારીઓમાં ફફડાટ ફેલાયો છે.

ACB સતત કાર્યરત 

આવી જ રીતે, ACBએ અગાઉ પણ અનેક ભ્રષ્ટ અધિકારીઓને ઝડપી પાડ્યા છે. આ પહેલા ભાવનગરમાં રેલવે વિભાગમાં ચાલતા ભ્રષ્ટાચારનો પર્દાફાશ થયો હતો, જેમાં ACBએ રેલવેના એક એન્જિનિયરને ₹65,000ની લાંચ લેતા ભાવનગર DRM કચેરીમાં જ રંગે હાથે ઝડપી પાડ્યો હતો. આ ઘટનાઓ દર્શાવે છે કે ભ્રષ્ટાચાર સામે લડવા માટે ACB સતત કાર્યરત છે.