સુરત જિલ્લાના ઓલપાડ તાલુકામાંથી ગેરકાયદેસર ખનન માફિયાઓ સામે એક મોટી કાર્યવાહીના સમાચાર સામે આવ્યા છે. ઓલપાડના અસનાબાદ ગામમાં આવેલા સરકારી તળાવમાં મોટા પાયે બિનઅધિકૃત રીતે માટી ખનન (ખોદકામ) ચાલી રહ્યું હોવાની ચોક્કસ બાતમી તંત્રને મળી હતી. આ માટી ખનન માટે અગાઉ લેવાયેલી સત્તાવાર પરમિશન (મંજૂરી) ની મુદત પૂરી થઈ ગઈ હોવા છતાં, ભૂમાફિયાઓ દ્વારા વહીવટી તંત્રની આંખમાં ધૂળ નાખીને રાતોરાત જેસીબી અને ડમ્પરો વડે ગેરકાયદેસર રીતે માટી ઉલેચવાનું કૌભાંડ બેરોકટોક ચાલુ રાખવામાં આવ્યું હતું.
ખાણ ખનિજ વિભાગના આકસ્મિક દરોડા
આ ગેરકાયદેસર પ્રવૃત્તિ અંગે પૂરતી કાયદાકીય કવાયત બાદ, સુરત ખાણ ખનિજ વિભાગની ટીમે સપાટો બોલાવ્યો હતો. અધિકારીઓની અલગ-અલગ ટીમો બનાવીને અસનાબાદ તળાવના લોકેશન પર અચાનક આકસ્મિક દરોડા પાડવામાં આવ્યા હતા. ખાણ ખનિજ વિભાગની ગાડીઓ કાફલા સાથે ઘટનાસ્થળે ત્રાટકતાં જ ત્યાં ગેરકાયદેસર ખનન કરી રહેલા તત્વોમાં ભારે ફફડાટ ફેલાઈ ગયો હતો અને નાસભાગ મચી ગઈ હતી. જો કે, સરકારી અધિકારીઓએ સ્થળ પર જ ઘેરાબંધી કરીને ગેરકાયદેસર પ્રવૃત્તિને રંગેહાથ ઝડપી પાડી હતી.
