સુરત શહેરમાંથી ફરી એકવાર શોર્ટ સર્કિટના કારણે આગ લાગવાની અત્યંત ચોંકાવનારી ઘટના સામે આવી છે. સુરતના વરાછા રોડ પર આવેલા માતાવાડી વિસ્તારની પ્રખ્યાત 'સદભાવના શાળા' માં ક્લાસરૂમ શરૂ થાય તે પૂર્વે જ એર કંડિશનર માં અચાનક ભયાનક બ્લાસ્ટ થયો હતો. આ જોરદાર વિસ્ફોટના કારણે શાળા પરિસરમાં ક્ષણભરમાં જ અફરાતફરી અને ગભરાટનો માહોલ ફેલાઈ ગયો હતો.
જોરદાર ધડાકાથી ગુંજી ઉઠી શાળા
સવારે જ્યારે વિદ્યાર્થીઓ શાળાએ પહોંચી રહ્યા હતા, ત્યારે જ એક ક્લાસરૂમમાં મુકેલા ACમાં ટેકનિકલ ખામી કે શોર્ટ સર્કિટના કારણે જોરદાર ધડાકો થયો હતો. ધડાકા સાથે જ ક્લાસરૂમમાં આગની જ્વાળાઓ અને કાળો ધુમાડો ઓકાવવાનું શરૂ થઈ ગયું હતું. આ દ્રશ્ય જોઈને શાળામાં હાજર માસૂમ બાળકો અને સ્ટાફના જીવ તાળવે ચોંટ્યા હતા અને જીવ બચાવવા માટે દોડધામ મચી ગઈ હતી. જોકે, સદનસીબે આ દુર્ઘટના શાળાના નિયમિત વર્ગો પૂરેપૂરા શરૂ થાય તે પહેલાં ઘટી હોવાથી એક બહુ મોટી જાનહાનિ થતાં અટકી ગઈ હતી.
