સુરેન્દ્રનગરમાં ચૂંટણીની મહત્વની કામગીરીમાં ગંભીર બેદરકારી દાખવનાર એક શિક્ષક વિરુદ્ધ થાનગઢ મામલતદાર દ્વારા ધરપકડ વોરંટ ઇશ્યૂ કરવામાં આવતાં સરકારી કર્મચારીઓમાં ચકચાર મચી જવા પામી છે. થાનગઢના આણંદપર ગામની શાળાના શિક્ષક વિજયકુમાર જુવાનસિંહ બારૈયાની ચૂંટણી પંચ દ્વારા બૂથ લેવલ ઓફિસર તરીકે નિમણૂક કરવામાં આવી હતી. જોકે શિક્ષક વિજય બારૈયા દ્વારા આ મહત્વની ચૂંટણી કામગીરીમાં સતત ગેરહાજરી દાખવવામાં આવતી હતી.
થાનગઢ મામલતદારે ધરપકડ વોરંટ ઇશ્યૂ કર્યુ
મામલતદાર કચેરી દ્વારા શિક્ષક વિજય બારૈયાને વારંવાર ટેલિફોનિક સૂચનાઓ આપવામાં આવી હોવા છતાં તેઓ હાજર થયા નહોતા. શિક્ષક તરફથી એવું કારણ રજૂ કરવામાં આવ્યું હતું કે વેકેશન હોવાને કારણે તે પોતાના વતનમાં છે. પરંતુ ચૂંટણીની કામગીરી સમયસર પૂર્ણ કરવી અનિવાર્ય હોવાથી અને શિક્ષકની ગેરહાજરીના કારણે કામગીરી પર ગંભીર અસર પડી શકે તેમ હોવાથી થાનગઢ મામલતદારે આ મામલે કડક વલણ અપનાવ્યું હતું.
