સુરેન્દ્રનગર જિલ્લાના ધ્રાંગધ્રા શહેર માટે એક ગૌરવપૂર્ણ સિદ્ધિ હાંસલ થઈ છે, જ્યાં ધ્રાંગધ્રાની શિશુકુંજ શાળાના ત્રણ પ્રતિભાશાળી એથ્લેટ્સ SGFI (સ્કૂલ ગેમ્સ ફેડરેશન ઓફ ઇન્ડિયા) રાષ્ટ્રીય કક્ષાની સ્પર્ધામાં ગુજરાત રાજ્યનું પ્રતિનિધિત્વ કરશે. તાજેતરમાં યોજાયેલી SGFI શાળાકીય રાજ્યકક્ષા એથ્લેટિક્સ સ્પર્ધામાં આ યુવા ખેલાડીઓએ ઉત્કૃષ્ટ પ્રદર્શન કરીને રાષ્ટ્રીય સ્તરે સ્થાન મેળવ્યું છે. ઘણા વર્ષોના લાંબા અંતરાલ બાદ એથ્લેટિક્સની રમતમાં એકસાથે ત્રણ ખેલાડીઓ રાષ્ટ્રીય મંચ સુધી પહોંચ્યા હોવાથી સમગ્ર શહેર અને જિલ્લામાં હર્ષ અને આનંદની લાગણી છવાઈ ગઈ છે.
આંતરરાષ્ટ્રીય સ્તરે ચમકાવવા માટે પ્રતિબદ્ધ
આ ત્રણેય ખેલાડીઓ સ્પોર્ટ્સ ઓથોરિટી ઓફ ગુજરાત (SAG) દ્વારા સંચાલિત 'ઇન સ્કૂલ યોજના' અંતર્ગત તાલીમ મેળવી રહ્યા છે. SAGની આ યોજના યુવા પ્રતિભાઓને શાળા સ્તરેથી જ યોગ્ય માર્ગદર્શન અને સુવિધાઓ પૂરી પાડીને તેમને રાષ્ટ્રીય અને આંતરરાષ્ટ્રીય સ્તરે ચમકાવવા માટે પ્રતિબદ્ધ છે. આ યોજનાની સફળતાનું આ એક જીવંત ઉદાહરણ છે. રાષ્ટ્રીય સ્પર્ધામાં સ્થાન મેળવનાર ખેલાડીઓમાં ગરીયા ભરત રણછોડભાઈ (હેમર થ્રો), વણઝારા અમન પ્રકાશભાઈ (ઊંચી કૂદ), અને સુમેરા પ્રશાંત મેહુલભાઈ (૨૦૦ મીટર દોડ)નો સમાવેશ થાય છે.
