Banaskantha News : થરાદ-ભારતમાલા હાઈવે પર અકસ્માત, ટ્રક ટોલનાકાની કેબિનમાં ઘૂસી

થરાદના ભારતમાલા હાઈવે પર ટોલનાકા પાસે મોડી રાત્રે એક ગંભીર અકસ્માત સર્જાયો હતો. હાઈવે પર સ્ટ્રીટ લાઈટોના આભાવે એક ટ્રક સીધી ટોલનાકાની કેબિનમાં ઘૂસી ગઈ હતી. સદનસીબે, આ અકસ્માત સમયે કેબિનમાં કોઈ કર્મચારી હાજર ન હોવાથી મોટી જાનહાનિ ટળી હતી. આ ઘટનાએ હાઈવે ઓથોરિટીની બેદરકારી પર ગંભીર સવાલો ઉભા કર્યા છે.

સ્ટ્રીટ લાઈટોનો અભાવ

મળતી જાણકારી અનુસાર, આ ઘટના મોડી રાત્રે બની હતી. ટ્રકચાલક હાઈવે પર પૂરતી લાઈટો ન મળવાને કારણે ટોલનાકાની કેબિનનો સ્પષ્ટ અંદાજ આવી શક્યો નહતો. આ જ કારણોસર ટ્રક નિયંત્રણ ગુમાવીને સીધી કેબિનમાં ઘૂસી ગઈ. અકસ્માત એટલો ભયાનક હતો કે ટોલનાકાની કેબિનને ભારે નુકસાન થયું છે અને ત્યાં અફરાતફરીનો માહોલ સર્જાયો હતો.

હાઈવે ઓથોરિટીની બેદરકારી પર સવાલ

આ ઘટનાએ હાઈવે ઓથોરિટીની ગંભીર બેદરકારીને ઉજાગર કરી છે. રાષ્ટ્રીય ધોરીમાર્ગ પર પૂરતી સ્ટ્રીટ લાઈટની વ્યવસ્થા હોવી અનિવાર્ય છે જેથી રાત્રિના સમયે વાહનચાલકોને કોઈ મુશ્કેલી ન પડે. જો હાઈવે પર પૂરતી લાઈટિંગ હોત તો કદાચ આ અકસ્માત ટાળી શકાયો હતો. આ ઘટના બાદ વાહનચાલકો અને સ્થાનિક લોકોમાં ભારે રોષ જોવા મળી રહ્યો છે. તંત્ર દ્વારા તાત્કાલિક ધોરણે આ સમસ્યાનું નિરાકરણ લાવવામાં આવે તેવી માંગણી ઉઠી છે.