Tharadમાં એક વૃદ્ધે તકનો ઉત્તમ લાભ લીધો, હોસ્પિટલના કાઉન્ટર પરથી મોબાઈલની ઉઠાંતરી કરી થયા રવાના

બનાસકાંઠા જિલ્લાના થરાદમાં આવેલી એક ખાનગી હોસ્પિટલમાં મોબાઈલ ચોરીની એક ઘટના સામે આવી છે. આ ચોરીનો વીડિયો હોસ્પિટલના સીસીટીવી કેમેરામાં કેદ થયો હતો અને તે વાયરલ પણ થયો હતો. આ ઘટનાએ ફરી એકવાર જાહેર સ્થળોએ સાવચેતી રાખવાની જરૂરિયાત પર ભાર મૂક્યો હતો. થરાદની એક ખાનગી હોસ્પિટલના કાઉન્ટર પરથી એક વૃદ્ધ વ્યક્તિએ તકનો લાભ લઈને મોબાઈલ ફોનની ઉઠાંતરી કરી હતી.

હોસ્પિટલના કાઉન્ટર પરથી મોબાઇલની ચોરી

સીસીટીવી ફૂટેજમાં સ્પષ્ટ જોઈ શકાય છે કે આ વૃદ્ધ વ્યક્તિ બે વખત કાઉન્ટરની આસપાસ ચક્કર લગાવે છે અને જ્યારે કોઈનું ધ્યાન ન હોય ત્યારે ખૂબ જ ચાલાકીપૂર્વક મોબાઈલ ફોન લઈ લે છે. વીડિયોમાં જોઈ શકાય છે કે વૃદ્ધ વ્યક્તિ પહેલા કાઉન્ટર પાસે આવે છે અને આસપાસ જુએ છે. જ્યારે તેને ખાતરી થઈ જાય છે કે કોઈ તેને જોઈ રહ્યું નથી, ત્યારે તે મોબાઈલ ફોન પર હાથ સાફ કરી લે છે. આખી ઘટના ગણતરીની મિનિટોમાં બની ગઈ હતી.

સમગ્ર ઘટના હોસ્પિટલના CCTV કેમેરામાં કેદ

આ ઘટના બાદ હોસ્પિટલના સ્ટાફને મોબાઈલ ગાયબ થયાની જાણ થઈ હતી અને તરત જ સીસીટીવી ફૂટેજ તપાસવામાં આવ્યા હતા. ફૂટેજમાં ચોરીનો આખો બનાવ કેદ થઈ ગયો હતો. હાલમાં આ વીડિયો સોશિયલ મીડિયા પર વાયરલ થયો છે અને લોકોમાં ચર્ચાનો વિષય બન્યો છે. પોલીસે આ વીડિયોના આધારે આરોપીની શોધખોળ શરૂ કરી છે. આ ઘટનાએ હોસ્પિટલ જેવા જાહેર સ્થળોએ સુરક્ષા વ્યવસ્થાને વધુ મજબૂત બનાવવાની આવશ્યકતા પર ભાર મૂક્યો છે.