Tharadમાં તલાટી કમ મંત્રીની દાદાગીરી, RTI માંગનાર અરજદાર સાથેની ઝપાઝપીનો વીડિયો વાયરલ

બનાસકાંઠા જિલ્લાના થરાદ તાલુકામાં એક ચોંકાવનારો કિસ્સો સામે આવ્યો છે. જ્યાં થરાદ તાલુકા તલાટી કમ મંત્રી એસોસિએશનના પ્રમુખ અને દોલતપુરા તથા બુઢનપુર ગ્રામ પંચાયતોમાં ફરજ બજાવતા પ્રકાશ ચૌધરી નામના તલાટી કમ મંત્રીની દાદાગીરીનો એક વીડિયો સોશિયલ મીડિયા પર વાયરલ થયો છે. આ વિવાદનું મૂળ એક જન્મ પ્રમાણપત્ર છે. એક અરજદારને તલાટી પ્રકાશ ચૌધરી દ્વારા આપવામાં આવેલો જન્મનો દાખલો ખોટો હોવાનું જણાયું હતું. 

અરજદાર સાથે તલાટી કમ મંત્રીએ કરી ઝપાઝપી

જેના કારણે અરજદારે આ મામલે માહિતી અધિકાર કાયદા (RTI) હેઠળ માહિતીની માંગણી કરી હતી. પોતાની સામે RTI કરવામાં આવતા તલાટી કમ મંત્રી પ્રકાશ ચૌધરી એકદમ ઉશ્કેરાઈ ગયા હતા. વીડિયોમાં વાતચીત અને દ્રશ્યો પરથી જણાય છે કે તલાટીએ અરજદાર સાથે ઉગ્ર દલીલો કરી હતી અને મામલો ઝપાઝપી સુધી પહોંચ્યો હતો. વીડિયોમાં તલાટીએ અરજદારને લાફો મારી દીધો હોવાની વાતચીત પણ સ્પષ્ટપણે સંભળાય છે જે તેમની દાદાગીરી દર્શાવે છે.

સરકારી કર્મચારીના વર્તન સામે સવાલો

તલાટી કમ મંત્રી જેવા સરકારી કર્મચારી દ્વારા નાગરિક સાથે જાહેરમાં આ પ્રકારનું અશોભનીય વર્તન અને ઝપાઝપી કરવી એ તેમની જવાબદારી અને ફરજ પ્રત્યેની બેદરકારી દર્શાવે છે. અરજદાર દ્વારા કાયદેસર રીતે RTI મારફતે માહિતી માંગવામાં આવી હોવા છતાં તલાટીનું ઉશ્કેરાઈ જવું અને હિંસક બનવું એ સરકારી સેવામાં તેમના વર્તન સામે ગંભીર સવાલો ઊભા કરે છે. સમગ્ર ઘટનાનો વીડિયો વાયરલ થતાં હવે આ મામલે જિલ્લા વહીવટી તંત્ર દ્વારા તલાટી પ્રકાશ ચૌધરી વિરુદ્ધ કડક પગલાં લેવામાં આવે તેવી શક્યતા છે.