વડોદરાના મકરપુરા GIDC વિસ્તારમાંથી એક આઘાતજનક સમાચાર સામે આવ્યા છે. વડોદરાની મકરપુરા GIDCમાં આવેલી જાણીતી ERDA કંપનીમાં ફરજ બજાવતા એક એપ્રેન્ટિસ યુવકનું કરંટ લાગવાના કારણે મોત નીપજ્યું છે. આ ઘટનાને પગલે કંપની પરિસરમાં ભારે અફરાતફરી મચી ગઈ હતી, અને મૃતક યુવકના પરિવારમાં માતમ છવાઈ ગયો છે.
એપ્રેન્ટિસ તરીકે કામ કરતા યુવકનું મોત
ઘટનાની મળતી માહિતી મુજબ, હર્ષ સહાની નામનો યુવક ERDA કંપનીમાં એપ્રેન્ટિસ તરીકે કામ કરતો હતો. કંપનીમાં ટ્રાન્સફોર્મરનું કામ કરતી વખતે અચાનક હર્ષને વીજકરંટ લાગ્યો હતો. કરંટ એટલો ભયાનક હતો કે, યુવક ઘટના સ્થળે જ ઢળી પડ્યો હતો. તેને તાત્કાલિક સારવાર માટે હોસ્પિટલ ખસેડવામાં આવે તે પહેલાં જ તેનું મોત નીપજ્યું હતું.
