Vadodara : શહેર અને જિલ્લાના માર્ગોનું સમારકામ અને ખાડા પૂરવાની કામગીરી પૂરજોશમાં શરૂ

ભારે વરસાદ અને સતત વાહનોની અવરજવરના કારણે માર્ગોને થયેલા નુકસાન બાદ વડોદરા શહેર અને જિલ્લાના માર્ગ અને મકાન વિભાગ દ્વારા સમારકામ અને વિવિધ ટેકનીકસ પ્રયોજીને ખાડા પૂરવાના કામોનો સમાવેશ થાય છે. જેમાં રસ્તાઓના પૂર બાદ શહેર જિલ્લાના 77 માર્ગો ઉપર પડેલા 542 ખાડાઓને પેચવર્ક કરી દુરસ્ત કરવામાં આવ્યા છે.

પેચવર્કની કામગીરીને યુદ્ધના ધોરણે શરૂ

માર્ગ અને મકાન (ગ્રામ્ય)ના કાર્યપાલક ઈજનેર નૈનેષ નાયકાવાલાએ જણાવ્યું કે શહેર અને જિલ્લા વિસ્તાર હસ્તક કુલ 1032.912 કિલોમીટરના માર્ગો છે. જેમાં મેજર પેચવર્ક માટે જરૂરી લંબાઈ 21.430 કિલોમીટર રસ્તા અને માયનોર પેચવર્ક માટે જરૂરી લંબાઈ 16.80 કિલોમીટર રસ્તાઓની પેચવર્ક કામગીરી કરવાની થાય છે. તંત્ર દ્વારા પેચવર્કની કામગીરીને યુદ્ધના ધોરણે હાથે લેવાતા અત્યાર સુધીમાં 90.70% એટલે કે 19.430 કિલોમીટર મેજર પેચવર્ક અને 12.090 કિલોમીટર કામગીરી પૂર્ણ થઈ ગઈ છે. આ સાથે બાકી રહેલી કામગીરી તાત્કાલિક પૂર્ણ કરવાની પ્રક્રિયા હેઠળ છે.

બાકી રહેલા 91 ખાડાઓની કામગીરી ત્વરિત પૂર્ણ કરવામાં આવશે

જ્યારે માર્ગને મકાન વિભાગ દ્વારા કુલ 633 પોટ હોલ્સ ઓળખીને કામગીરી હાથ ધરવામાં આવી છે. જેમાં રસ્તાઓને પૂર્વવત બનાવવા 542 ખાડાઓ પૈકી 19 ખાડાઓ કોન્ક્રિટ, 9 પેવરબ્લોક, 366 મેટલ અને 148 કોલ્ડ મિક્ષ સામગ્રીનો ઉપયોગ કરીને પૂરવામાં આવ્યા છે. બાકી રહેલા 91 ખાડાઓની કામગીરી ત્વરિત પૂર્ણ કરવામાં આવશે. ઉલ્લેખનીય છે કે ભારે વરસાદને કારણે રાજ્યમાં ઘણા રોડ પાણીમાં ધોવાયા છે અને જ્યાં જુઓ ત્યાં રોડ ઉપર ખાડા પણ જોવા મળી રહ્યા છે. ખાડાઓના કારણે રાજ્યમાં અકસ્માતોની સંખ્યામાં પણ વધારો થઈ રહ્યો છે.