Vadodaraના નેશનલ હાઈવે 48 પર સર્જાયો ભયંકર ટ્રાફિક જામ, 15 કિલોમીટર લાંબા ટ્રાફિકમાં અટવાયા વાહનચાલકો

વડોદરા શહેર નજીક આવેલા નેશનલ હાઈવે-48 પર ફરી એકવાર ટ્રાફિક જામની ગંભીર સમસ્યા સર્જાઈ હતી. વડોદરા શહેરની બહાર આવેલી જાંબુઆ ચોકડી પાસે આજે અંદાજે 15 કિલોમીટર લાંબો ટ્રાફિક જામ સર્જાયો હતો. આ ટ્રાફિક જામના કારણે વાહનચાલકો અને મુસાફરો ભારે મુશ્કેલીમાં મુકાયા હતા. આ 15 કિલોમીટરના ભયંકર ટ્રાફિક જામમાં 3 થી 4 કલાક ભારદારી વાહનો સહિત અન્ય વાહનો પણ રસ્તા પર અટવાઈ ગયા હતા. આ સમસ્યાથી વાહનચાલકો અને મુસાફરો પરેશાન થઈ ગયા હતા.

ભારે વાહનોને કારણે ટ્રાફિકની ગતિ અત્યંત ધીમી પડી

ખાસ કરીને ભારે વાહનોને કારણે ટ્રાફિકની ગતિ અત્યંત ધીમી પડી ગઈ હતી. જેનાથી સામાન્ય વાહનોને પણ પસાર થવું મુશ્કેલ બન્યું હતું. જાંબુઆ ચોકડી પાસે ટ્રાફિક જામની સમસ્યા કોઈ નવી નથી. આ વિસ્તારમાં અવારનવાર ટ્રાફિક જામ થતો હોય છે. જે વાહનચાલકો માટે માથાનો દુખાવો બની ગયો હતો. આ સમસ્યાનું મુખ્ય કારણ ટ્રાફિકનું વધુ ભારણ અને યોગ્ય વ્યવસ્થાપનનો અભાવ હોવાનું જાણવા મળ્યું હતું.

સમસ્યાનું મુખ્ય કારણ ટ્રાફિકનું વધુ ભારણ હોઈ શકે 

આટલો લાંબો ટ્રાફિક જામ લાગવા છતાં તંત્ર દ્વારા કોઈ તાત્કાલિક પગલાં ભરવામાં આવ્યા નહોતા. જેના કારણે લોકોમાં ભારે રોષ જોવા મળ્યો હતો. વાહનચાલકોની માંગ હતી કે તંત્ર દ્વારા તાત્કાલિક ટ્રાફિકની સમસ્યા હળવી કરવામાં આવે અને ભવિષ્યમાં આવી ઘટનાઓ ન બને તે માટે કાયમી ઉકેલ લાવવામાં આવે.