Vadodara : આંગણવાડીઓમાં મુકાયેલા વોટર કૂલરમાં કથિત કૌભાંડ, મોટાભાગના વોટર કૂલર બંધ હાલતમાં, જવાબદારો સામે તપાસની માગ

વડોદરાની આંગણવાડીઓમાં વોટર કૂલરમાં કથિત કૌભાંડ આચરાયું હોવાનો આરોપ લાગતા ખળભળાટ મચી ગયો છે. શહેરના એક સામાજીક કાર્યકરે આરોપ લગાવ્યો છે કે શહેરની આંગણવાડીઓમાં મુકાયેલા મોટાભાગના વોટર કૂલર બંધ હાલતમાં છે. સામાજીક કાર્યકરે કહ્યું છે કે તેમણે કરેલી આરટીઆઇમાં કથિત કૂલરના કૌભાંડનો ખુલાસો થયો છે.

438 આંગણવાડીમાં કૂલર મુક્યાનું પેપર પર બતાવ્યું

વડોદરા કોર્પોરેશન સંચાલિક આંગણવાડીઓમાં કથિત કૂલરના કૌભાંડનો ખુલાસો થયો છે. આરોપ મુજબ 438 આંગણવાડીમાં કૂલર મુક્યાનું પેપર પર બતાવ્યું છે પણ 338 કૂલરના જ બિલ બતાવવામાં આવ્યા છે.

 2 કરોડથી વધુના ખર્ચે કૂલર ખરીદવામાં આવ્યા

આરટીઆઇ કાર્યકર કમલેશ પરમારે આરોપ લગાવ્યો હતો કે 2024ના વર્ષમાં વડોદરાની આંગણવાડીઓ માટે 2 કરોડથી વધુના ખર્ચે કૂલર ખરીદવામાં આવ્યા હતા પણ તેમણે કરેલી RTIમાં કથિત કૂલરના કૌભાંડનો ખુલાસો થયો છે. 438 આંગણવાડીમાં કુલર મુક્યાનું પેપર પર બતાવ્યું હતું પણ 338 કુલરના જ બિલ બતાવવામાં આવ્યા છે. અને આંગણવાડીમાં મોટાભાગે વોટર કૂલર બંધ હાલતમાં છે.

 આંગણવાડીમાં છેલ્લા 1 વર્ષથી કૂલર બંધ હાલતમાં જોવા મળ્યા

તેમણે આરોપ લગાવ્યો હતો કે આંગણવાડીમાં છેલ્લા 1 વર્ષથી કૂલર બંધ હાલતમાં જોવા મળ્યા છે અને 1 વોટર કૂલરનો ભાવ પણ સરેરાશ 60 હજાર છે અને આ કૂલર બજારભાવ કરતા ઊંચા ભાવે ખરીદ્યા છે.

તત્કાલિન અધિકારી ડો.દેવેશ પટેલ સામે તપાસની માગ

ફાયર વિભાગમાં સાધનોની ખરીદીમાં કથિત કૌંભાડ મામલે ડે અધિકારી ડો.દેવેશ પટેલ હાલ સસ્પેન્ડ થયેલા છે તે ડો. દેવેશ પટેલના કાર્યકાળમાં આ પ્રોજેક્ટ હાથ ધરાયો હતો. આ મામલે તત્કાલિન અધિકારી ડો.દેવેશ પટેલ સામે તપાસની માગ કરાઇ છે.

આંગણવાડીમાં પાણીની ટાંકી જ નથી તો કૂલરમાં પાણી કેવી રીતે આવે

આંગણવાડીમાં કામ કરતી બહેનોએ કહ્યું હતું કે આંગણવાડીમાં પાણીની ટાંકી જ નથી તો કૂલરમાં પાણી કેવી રીતે આવે અને પાણીની લાઇન પણ બંધ જ છે બાળકો ઘેરથી લાવે કાં તો બાજુમાંથી પાણી લાવવું પડે છે.

 કેટલીક આંગણવાડી તો પતરાવાળી છે અને પાણીની ટાંકી જ નથી

કમલેશ પરમારે કહ્યું હતું કે ડો.દેવેશ પટેલ તે સમયે આઇસીડીએસ હેડ હતા. 2024માં નવા કૂલરો ખરીદવાની મંજૂરી તેમણે આપી હતી. કૂલરો તો મુકી દીધા પણ અમારી જાત તપાસમાં જાણવા મળ્યું છે કે મોટાભાગના કૂલરો બંધ હાલતમાં છે. કેટલીક આંગણવાડી તો પતરાવાળી છે અને પાણીની ટાંકી જ નથી તો પણ વોટર કૂલર મુકી દેવાયા છે. પાણીનું કનેક્શન નથી છતાં વોટર કૂલર મુકી દેવાયા હોવાનો તેમણે આરોપ લગાવ્યો છે.