Vadodara: રીફાઈનરી સ્કૂલને બોમ્બથી ઉડાવી દેવાની ધમકી, પોલીસે તપાસ શરૂ કરી

વડોદરામાં સ્કૂલને બોમ્બથી ઉડાવી દેવાની ધમકી મળી છે. વડોદરાની રીફાઈનરી સ્કૂલને ઈમેલ મારફતે બોમ્બથી ઉડાવી દેવાની ધમકી આપવામાં આવી છે. ધમકી મળ્યાની જાણ થતાં જ પોલીસે ઘટના સ્થળે પહોંચીને તપાસ શરૂ કરી દીધી છે. ગતરોજ નવરચના સ્કૂલને પણ બોમ્બથી ઉડાવી દેવાની ધમકી મળી હતી. સ્થાનિક પોલીસ અને રીફાઈનરીની સુરક્ષા એજન્સીએ તપાસ શરૂ કરી છે.

રીફાઈનરી સ્કૂલને બોમ્બથી ઉડાવાની ધમકી

પ્રાપ્ત વિગતો પ્રમાણે વડોદરામાં રીફાઈનરીમાં આવેલી સ્કૂલને આજે સવારે 6.47 વાગ્યે મળેલા ઈમેલમાં બોમ્બથી ઉડાવી દેવાની ધમકી આપવામાં આવી છે. ધમકી મળ્યાની જાણ થતાં જ પોલીસ ઘટના સ્થળે પહોંચી ગઈ હતી. રીફાઈનરીની સુરક્ષા એજન્સીની ટીમ અને પોલીસ દ્વારા સમગ્ર રીફાઈનરી અને સ્કૂલમાં બોમ્બ અંગેની તપાસ શરૂ કરવામાં આવી છે. બોમ્બની ધમકી મળતાં જ સમગ્ર પરિસરમાં ભય ફેલાયો હતો.

વડોદરામાં ફ્લાઈટને બોમ્બથી ઉડાવી દેવાની ધમકી

ગઈકાલે વડોદરામાં નવરચના સ્કૂલને પણ બોમ્બથી ઉડાવી દેવાની ધમકી મળી હતી. પોલીસે ડોગ સ્ક્વોર્ડ સાથે સ્કૂલમાં તપાસ હાથ ધરી હતી. બોમ્બની ધમકીને પગલે સ્કૂલને બંધ કરવામાં આવી હતી. આ ઉપરાંત વડોદરામાં એર ઈન્ડિયાની ફ્લાઈટને પણ ગઈકાલે બોમ્બથી ઉડાવી દેવાની ધમકી આપી હતી. CISFએ ધમકી આપનાર મુસાફરને પકડ્યો હતો. ફ્લાઈટમાં જતા એક મુસાફરે ધમકી આપી હતી. ફ્લાઈટની તપાસમાં કાઈ વાંધાજનક નહીં મળતા વડોદરાથી દિલ્હી માટે ફ્લાઈટ રવાના થઈ હતી.