Valsadની મુખ્ય બજારમાં બે આખલા બાખડ્યા, વાહનચાલકો અને રાહદારીઓને લીધા અડફેટે

વલસાડ શહેરમાં રખડતા ઢોરનો ત્રાસ ફરી એકવાર સામે આવ્યો છે. શહેરના પોસ્ટ ઓફિસ ચાર રસ્તા નજીક ભર બજારમાં બે આખલા યુદ્ધે ચઢતાં અફરાતફરીનો માહોલ સર્જાયો હતો. આખલાઓ રોડ પર એકબીજા સાથે લડી રહ્યા હતા અને વાહનચાલકો તેમજ રાહદારીઓને અડફેટે લીધા હતા. જેના કારણે લોકોમાં ભારે ભય અને નાસભાગ મચી ગઈ હતી. બનાવ સમયે રસ્તા પરથી પસાર થઈ રહેલા વાહનો અને લોકોએ પોતાનો જીવ બચાવવા માટે ભાગવું પડ્યું હતું.

રખડતા ઢોર લડતા લોકોમાં ભાગદોડ મચી

આખલાઓના યુદ્ધને કારણે ટ્રાફિક પણ ખોરવાયો હતો અને વાહનોની લાંબી કતારો લાગી ગઈ હતી. જોકે સદનસીબે આ ઘટનામાં કોઈને ગંભીર ઈજા થઈ નથી. પરંતુ આ પ્રકારની ઘટનાઓ શહેરી વિસ્તારમાં રખડતા ઢોરના પ્રશ્નની ગંભીરતા દર્શાવે છે. વલસાડ શહેરમાં રખડતા ઢોરનો ત્રાસ લાંબા સમયથી ચાલી રહ્યો છે. આ અંગે વારંવાર રજૂઆતો કરવા છતાં તંત્ર દ્વારા કોઈ નક્કર કાર્યવાહી કરવામાં આવતી નથી.

આખલાઓએ રોડ પર વાહન ચાલકોને લીધા અડફેટે 

રસ્તાઓ પર લડતા આખલાઓ અને અન્ય રખડતા ઢોર નાગરિકો માટે સતત જોખમરૂપ બની રહ્યા છે. આ ઘટનાએ ફરી એકવાર નગરપાલિકાની બેદરકારી અને આ સમસ્યાને અવગણવા બદલ તેની કાર્યપદ્ધતિ પર ગંભીર સવાલો ઉભા કર્યા છે. સ્થાનિકોની માંગ છે કે નગરપાલિકા દ્વારા આખલાઓને પકડીને યોગ્ય સ્થળે ખસેડવામાં આવે અને ભવિષ્યમાં આવા બનાવો ન બને તે માટે કડક પગલાં લેવામાં આવે.