વેરાવળના મંડોર ગામ નજીકથી એક દુઃખદ ઘટના સામે આવી છે. જ્યાં ગાગળીયા ઘુના નજીકથી એક યુવકનો મૃતદેહ મળી આવ્યો છે. પ્રાથમિક તપાસમાં આ યુવક અકસ્માતે પાણીમાં પડી જવાથી મૃત્યુ પામ્યો હોવાનું સામે આવ્યું છે. મૃતદેહ મળતા જ સમગ્ર વિસ્તારમાં શોકનું મોજુ ફરી વળ્યું છે. મૃતક યુવકની ઓળખ દેવા ભીખુભાઈ કામળિયા રહેવાસી પ્રભાસ પાટણ તરીકે થઈ છે.
ગાગળીયા ઘુના નજીક આ યુવકનો મૃતદેહ મળી આવ્યો
જાણવા મળ્યું છે કે દેવા સોમનાથ મહાદેવ મંદિરમાં ફોટોગ્રાફીનું કામ કરીને પોતાના પરિવારનું ગુજરાન ચલાવતો હતો. આ ઘટના સ્થળ નજીકથી તેનું મોપેડ પણ મળી આવ્યું છે. જેના પરથી સંભાવના છે કે તે અકસ્માતે પાણીમાં પડી ગયો હશે. સ્થાનિકો દ્વારા આ ઘટનાની જાણ પ્રભાસ પાટણ પોલીસને કરવામાં આવી હતી. માહિતી મળતા જ પોલીસ ટીમ તાત્કાલિક ઘટના સ્થળે પહોંચી હતી.
