ઉનામાં યુવાનના ખીસ્સામાં મોબાઇલ બ્લાસ્ટ થતાં અફરા-તફરી

• મોબાઇલ બ્લાસ્ટ થતા યુવાનને પહોંચી ઇજા
  
• ઇજાગ્રસ્ત યુવાનને સારવાર માટે ખસેડાયો
• સમગ્ર ઘટના CCTV કેમેરામાં કેદ

અત્યારે સૌ કોઈ મોબાઈલ રાખે જ છે. ત્યારે ઉનામાં એક યુવાનના ખીસ્સામાં મોબાઈલ બ્લાસ્ટ થતાં અફરા તફરી મચી ગઈ હતી. ઉના શહેરમાં યુવાન એક ઓફિસમાં આરામથી બેઠો હતો ત્યારે અચાનક જ ખિસ્સામાં રહેલો VIVOનો મોબાઇલ અચાનક બ્લાસ્ટ થયો હતો. મોબાઇલ બ્લાસ્ટ થતાં યુવાન પગના સાથળના ભાગે અને હાથના ભાગે ગંભીર રીતે દાઝ્યો હતો.

આ અંગેની માહિતી અનુસાર, ઉનામાં આવેલી મુથુટ ફાઇનાન્સની ઓફિસે ગીર ગઢડાના દ્રોણ ગામે રહેતા દલપત શંભુભાઈ મકવાણા ​​​​​​કોઈ કામ માટે આવ્યા હતા. ત્યાં ઓફિસના ટેબલ પર બેઠો હતો એ દરમિયાન થોડીકવારમાં યુવાનના ખિસ્સામાં રહેલો VIVO Y51 કંપનીનો મોબાઇલ અચાનક ગરમ થવા લાગ્યો અને ધુમાડા નીકળવા લાગ્યા હતા.

જોકે અચાનક જ મોબાઈલ બ્લાસ્ટ થતાં યુવાને તરત પોતાના ખિસ્સામાં હાથ નાખીને મોબાઇલ બહાર કાઢી ફેંકી દીધો હતો, જેથી સદનસિબે મોટી દુર્ઘટના થતાં અટકી હતી. હાલ ઈજાગ્રસ્ત યુવકને સારવાર અર્થે હોસ્પિટલે ખસેડવામાં આવ્યો છે. આ સમગ્ર ઘટના CCTV કેમેરામાં કેદ થઈ હતી. આ ગંભીર દુર્ઘટના બનતાં લોકોમાં ભયનું વાતાવરણ ફેલાયું હતું.