Dwarka ઓખાના દરિયામાં સુરક્ષાને લઈ કરાયો વધારો, સમુદ્રમાં કોસ્ટગાર્ડ-મરીન પોલીસનું સંયુક્ત પેટ્રોલિંગ

દ્વારકાના ઓખામાં દરિયામાં સુરક્ષાને લઈ વધારો કરવામાં આવ્યો છે, સમુદ્રમાં કોસ્ટગાર્ડ અને મરીન પોલીસનું સંયુકત પેટ્રોલિંગ ચાલી રહ્યું છે, તો માછીમારોને અને સ્થાનિકોને સરહદી સીમા નજીક ન જવા સૂચના આપવામાં આવી છે, તો પોલીસ અને કોસ્ટગાર્ડની સતત નજર સીમા વિસ્તારમાં છે, હાલ ભારત પાકિસ્તાનના યુદ્ધને લઈને દેવભૂમિ દ્વારકા જિલ્લાના દરિયાઈ વિસ્તારની સુરક્ષામાં વધારો કરવામાં આવ્યો છે.

ગાંધીનગરના સ્ટેટ ઇમરજન્સી ઓપરેશન સેન્ટર પર યોજાઈ હતી બેઠક

દેશમાં વર્તમાન સ્થિતિને ધ્યાનમાં રાખીને ગુજરાત સરહદી રાજ્ય હોવાથી સરહદી જિલ્લાની પરિસ્થિતિ પર સતત નજર રાખવા મુખ્યમંત્રી ભૂપેન્દ્ર પટેલની સૂચનાથી સ્ટેટ ઇમરજન્સી ઓપરેશન સેન્ટર, ગાંધીનગર ખાતે ગૃહ રાજ્ય મંત્રી હર્ષ સંઘવીના અધ્યક્ષ સ્થાને ઈમરજન્સી સમીક્ષા બેઠક યોજાઈ હતી. જેમાં મંત્રીએ સંબંધિત જિલ્લાના કલેક્ટરો તથા જિલ્લા પોલીસ વડાઓ સાથે ટેલીફોનીક વાત કરી સ્થાનિક સ્થિતિ અંગે જાણકારી મેળવીને કોઈ અનિચ્છનીય બનાવ ન બને, કોઈ પેનિક ન થાય તથા વિશેષ તકેદારી રાખવામાં આવે તે માટે જરૂરી સાવચેતીના પગલાં ભરવા સૂચનાઓ આપી. આ બેઠકમાં મુખ્ય સચિવ પંકજ જોશી, અધિક મુખ્ય સચિવ જયંતિ રવિ, રાહત કમિશનર આલોક કુમાર પાંડે અને ગુજરાત પોલીસ વડા વિકાસ સહાય સહિતના ઉચ્ચ અધિકારીઓ ઉપસ્થિત છે.