Surat: બિલ્ડરે લોન નહીં ભરતા બેંકે બિલ્ડિંગને સીલ માર્યુ, ફ્લેટ ધારકોનો હોબાળો

સુરતમાં બિલ્ડરે લોન નહીં ભરીને ફ્લેટ ધારકો સાથે ચીટીંગ કર્યુ હોવાનો આક્ષેપ કરવામાં આવ્યો છે. સુરતના વાડી ફળિયામાં સ્થિત ચકાવા શેરીમાં બેંકના કર્મચારીઓ બિલ્ડિંગને સીલ મારવા જતાં હોબાળો થયો હતો. પોલીસ તાત્કાલિક ઘટના સ્થળે પહોંચી હતી અને મધ્યસ્થી કરતાં બેંકે સીલ મારવાનું ટાળ્યું હતું. બિલ્ડરે ઠગાઈ કરતાં ફ્લેટ ધારકો મુશ્કેલીમાં મુકાયા હતાં.

બેંકના કર્મચારીઓ ફ્લેટને સીલ મારવા માટે પહોંચ્યા

પ્રાપ્ત વિગતો પ્રમાણે સુરત શહેરમાં વાડી ફળિયામાં સ્થિત ચકાવા શેરીમાં બિલ્ડર ભરત સિંધીએ 2020માં ફ્લેટ વેચ્યા હતાં. ત્યારબાદ બિલ્ડરે આ જ ફ્લેટ પર 2023માં લોન લીધી હતી. બિલ્ડરે બેંકમાંથી લોન લઈને પૈસા નહીં ભરતા બેંકના કર્મચારીઓ ફ્લેટને સીલ મારવા માટે પહોંચ્યા હતાં. ત્યારે ફ્લેટ ધારકોને જાણ થઈ હતી કે, બિલ્ડરે ફ્લેટ ધારકો સાથે ઠગાઈ આચરી છે. ફલેટ ધારકોએ બિલ્ડરને પૈસા આપી દીધા હોવા છતાં તેણે દસ્તાવેજ નહીં કરી આપ્યો હોવાનો પણ આક્ષેપ કરવામાં આવ્યો છે.

ફ્લેટ ધારકોની સ્થિતિ આખરે જાયે તો જાયે કહાં જેવી થઈ

બિલ્ડરે લોન નહીં ભરતા આખરે બેંકના કર્મચારીઓ આજે આખી બિલ્ડિંગને સીલ મારવા માટે પહોંચ્યા હતાં. જ્યાં ફ્લેટ ધારકો અને બેંકના કર્મચારી વચ્ચે હોબાળો થયો હતો. આ ઘટનાની જાણ થતાં જ પોલીસ પણ તાત્કાલિક ઘટના સ્થળે પહોંચી ગઈ હતી અને મામલો થાળે પાડ્યો હતો. પોલીસે મધ્યસ્થી કરતાં બેંકના કર્મચારીઓએ બિલ્ડિંગને સીલ મારવાનું ટાળ્યું હતું. બિલ્ડરના કારણે ફ્લેટ ધારકોની સ્થિતિ આખરે જાયે તો જાયે કહાં જેવી થઈ ગઈ છે.