Surat: રેગિંગ મુદ્દે જુનિયર તબીબના ભાઈએ સિનિયર ડોક્ટરને વોર્ડમાં ઘૂસીને માર માર્યો

સુરતમાં નવી સિવિલ હોસ્પિટલ વધુ એક વખત વિવાદમાં આવી છે. હોસ્પિટલમાં રેગિંગ બાબતે તબીબો વચ્ચે બબાલ થઈ હોવાની ઘટના સામે આવી છે. હોસ્પિટલમાં જુનિયર તબીબના ભાઈએ સિનિયર તબીબને માર મારતા હોસ્પિટલમાં દર્દીઓ અને હોસ્પિટલનો સ્ટાફ એકઠા થઈ ગયા હતાં. ભારે હોબાળો થતાં સમગ્ર હોસ્પિટલમાં ચકચાર મચી જવા પામી હતી.

સમગ્ર મામલો સિવિલ પોલીસ ચોકીમાં પહોંચ્યો

પ્રાપ્ત વિગતો પ્રમાણે સુરતની નવી સિવિલ હોસ્પિટલમાં રેગિંગ બાબતે જુનિયર ડોક્ટરના ભાઈએ સિનિયર ડોક્ટરને માર મારતા મામલો બીચક્યો હતો. હોસ્પિટલના વોર્ડમાં જ સમગ્ર બાબતે બબાલ થતાં દર્દીઓ અને હોસ્પિટલનો સ્ટાફ એકઠા થઈ ગયા હતાં. જૂનિયર ડોક્ટરના ભાઈએ સિનિયર ડોક્ટરને કિડની બિલ્ડિંગના 7-D વોર્ડમાં ઘૂસીને માર્યો હતો. આખરે સમગ્ર મામલો સિવિલ પોલીસ ચોકીમાં પહોંચ્યો હતો.

સિનિયર ડોક્ટરને વોર્ડમાં ઘૂસીને માર માર્યો

સિવિલ હોસ્પિટલમાં આજે સવારે કિડની બિલ્ડીંગના 7-D વોર્ડમાં જુનિયર ડૉક્ટરનું રેગીગ કરવાનું સિનિયર ડોક્ટરને ભારે પડ્યું છે. જુનિયર ડોકટરના ભાઈએ સિનિયર ડોક્ટરને વોર્ડમાં ઘૂસીને માર મારતાં સમગ્ર હોસ્પિટલમાં ચકચાર મચી જવા પામી હતી. રેગિંગની ઘટનાઓ અટકવાને બદલે વધી રહી છે. પોલીસે સમગ્ર બાબતે વધુ તપાસ હાથ ધરી છે.