Surat: ડિજિટલ એરેસ્ટ કરતી ગેંગનો સુત્રધાર ઝડપાયો, પાર્થ ગોપાણી લખનઉ એરપોર્ટથી ઝડપાયો

ગુજરાતમાં ડિજિટલ એરેસ્ટના બનાવો સતત સામે આવી રહ્યાં છે. લોકોને ડર બતાવીને નાણાં ખંખેરનારા તત્વો બેફામ બન્યાં છે. ત્યારે સુરત ક્રાઈમ બ્રાંચે ડિજિટલ એરેસ્ટ કરીને નાણાં પડાવનાર સુત્રધાર પાર્થ ગોપાણીને ઝડપી પાડ્યો છે. પોલીસે પાર્થ ગોપાણીને લખનઉ એરપોર્ટ પરથી પકડી પાડ્યો છે. અગાઉ સાયબર ક્રાઈમે પાંચ આરોપીઓને ઝડપી પાડ્યા હતાં.

દેશભરમાં આ ગેંગ વિરુદ્ધ 173 ફરિયાદ નોંધાઈ છે

પ્રાપ્ત વિગતો પ્રમાણે સુરતમાં ડિજિટલ એરેસ્ટ કરીને લોકો પાસેથી નાણાં ખંખેરતી ગેંગનો સુત્રધાર ઝડપાયો છે. લખનઉ એરપોર્ટથી આરોપી પાર્થ ગોપાણીને પોલીસે ઝડપી પાડ્યો છે. પાર્થ ત્રણ મહિનાથી નેપાળ રહેતો હતો. નેપાળથી તે લખનઉ કામ અર્થે આવ્યો હતો. અગાઉ પોલીસે ગેંગના આરોપીઓને ઝડપી લીધા બાદ પાર્થ નેપાળ ભાગી ગયો હતો. સમગ્ર દેશમાં આ ગેંગ સામે 173 ફરિયાદો નોંધાઈ છે.

નાણાં ટ્રાન્સફર કરાવી USDTમાં કન્વર્ટ કરતો હતો

આરોપી પાર્થ ચાઈના સાથે રહીને કંબોડિયા ખાતેથી કોલ સેન્ટર ચલાવતો હતો. તે લોકોને ડિજિટલ એરેસ્ટ કરીને નાણાં પડાવતો હતો. આ નાણાંને ટ્રાન્સફર કરાવી USDTમાં કન્વર્ટ કરતો હતો. અગાઉ સાયબર ક્રાઈમે ડિજિટલ એરેસ્ટ કરતી આ ગેંગના પાંચ આરોપીઓને ઝડપી પાડ્યા હતાં. પોલીસ પાર્થને ઝડપી પાડવા માટેના પ્રયાસો કરતી હતી. આ દરમિયાન પાર્થ લખનઉ એરપોર્ટથી ઝડપાઈ ગયો છે.