- ગ્રેસ માર્ક્સ મેળવનારા 1563 વિદ્યાર્થીઓની યોજાઈ પરીક્ષા
- છત્તીસગઢના બાલોદમાં 185માંથી 70 વિદ્યાર્થીઓ રહ્યા ગેરહાજર
- ચંડીગઢમાં 2 પરીક્ષાર્થીઓ માટે બન્યું સેન્ટર, બંને આવ્યા નહીં
NEET-UG પરીક્ષાનું પેપર લીક થયા બાદ, NEET પરિણામમાં ગ્રેસ માર્ક્સ મેળવનારા 1563 વિદ્યાર્થીઓ માટે આજે એટલે કે 23મી જૂને પુનઃપરીક્ષાનું આયોજન કરવામાં આવ્યું હતું. પરીક્ષા બપોરે 2 થી 5.20 દરમિયાન લેવામાં આવી હતી. કેન્દ્રો પર પરીક્ષા શરૂ થઈ પરંતુ રસપ્રદ વાત એ છે કે ઘણા કેન્દ્રો પર વિદ્યાર્થીઓ પરીક્ષા આપવા આવ્યા ન હતા. કેન્દ્ર પર પહોંચવાનો સમય ઉપરાંત ગેટ બંધ થવાનો સમય પણ વીતી ગયો, પરંતુ ઘણા વિદ્યાર્થીઓ પરીક્ષામાં હાજર રહ્યા ન હતા.
છત્તીસગઢના બાલોદમાં પરીક્ષા કેન્દ્ર બનાવવામાં આવ્યું હતું
આ માહિતી છત્તીસગઢ અને ચંદીગઢથી સામે આવી છે. છત્તીસગઢના બાલોદમાં સ્થાપિત પરીક્ષા કેન્દ્રમાં 185 વિદ્યાર્થીઓ પુનઃ પરીક્ષા આપવાના હતા, પરંતુ અહીં 70 વિદ્યાર્થીઓ ગેરહાજર રહ્યા હોવાનું પ્રકાશમાં આવ્યું છે. ચંડીગઢથી જાણવા મળ્યું છે કે અહીં માત્ર બે વિદ્યાર્થીઓ માટે પરીક્ષા કેન્દ્ર બનાવવામાં આવ્યું હતું, પરંતુ બંને વિદ્યાર્થીઓ પરીક્ષા કેન્દ્ર પર પહોંચ્યા નથી.
સરકારે મોટું પગલું ભર્યું
ઉલ્લેખનીય છે કે NEET અને UGC-NET પરીક્ષાઓમાં કથિત ગેરરીતિઓને લઈને ચાલી રહેલા વિવાદ વચ્ચે કેન્દ્ર સરકારે ભવિષ્યમાં પેપર લીકની ઘટનાઓને રોકવા માટે એક મોટું પગલું ભર્યું છે. સરકારે જાહેર પરીક્ષાઓ (અયોગ્ય માધ્યમો નિવારણ) અધિનિયમ, 2024 ને સૂચિત કર્યું, જેનો હેતુ દેશભરમાં યોજાતી સ્પર્ધાત્મક અને સામાન્ય પ્રવેશ પરીક્ષાઓમાં છેતરપિંડી અટકાવવાનો છે.
5મી મેના રોજ દેશભરમાં NEET-UG ની પરીક્ષા લેવામાં આવી હતી
NEET-UG પરીક્ષા 5 મેના રોજ દેશભરના 4,750 કેન્દ્રો પર લેવામાં આવી હતી અને લગભગ 24 લાખ વિદ્યાર્થીઓએ તેમાં ભાગ લીધો હતો. પરીક્ષાનું પરિણામ 4 જૂને જાહેર કરવામાં આવ્યું હતું, પરિણામ 10 દિવસ અગાઉ જાહેર કરવામાં આવ્યું હતું. પરિણામો પછી પેપર લીક અને અનિયમિતતાના આક્ષેપો ઉભા થયા હતા, કારણ કે 67થી વધુ વિદ્યાર્થીઓએ મહત્તમ ગુણ મેળવ્યા હતા, જેમાંથી કેટલાક એક જ પરીક્ષા કેન્દ્રના હતા.
પોલીસ દ્વારા કરવામાં આવેલી પ્રાથમિક તપાસમાં બિહારમાં ગેરરીતિ અને પેપર લીકનો મામલો સામે આવ્યો હતો. આ સાથે કેટલાક ઉમેદવારોએ પરીક્ષાના એક દિવસ પહેલા પેપર મળ્યા હોવાનો દાવો કરીને જાહેરમાં સામે આવ્યા છે. આ આરોપોને કારણે અનેક શહેરોમાં વિરોધ થયો હતો અને અનેક હાઈકોર્ટ તેમજ સુપ્રીમ કોર્ટમાં અરજીઓ દાખલ કરવામાં આવી હતી.
