- ચારધામ યાત્રા માટે રજિસ્ટ્રેશન અનિવાર્ય
- જો રજિસ્ટ્રેશન નહી કરાવ્યુ હોય તો થશે અસુવિધા
- ફેક રજિસ્ટ્રેશન કરવાથી બચો, મૂકાશો મુશ્કેલીમાં
ચારધામ યાત્રા પર શ્રદ્ધાળુઓની ભીડ ઉમટી રહી છે. 10મેથી કેદારનાથ યાત્રા શરૂ થયાના 13 દિવસમાં 8 લાખથી વધારે તીર્થયાત્રીઓ દર્શન કરી ચૂક્યા છે. તેમાં પણ ખાસ કરીને ઉત્તરાખંડ સરકાર દ્વારા અપીલ કરવામાં આવી છે કે રજિસ્ટ્રેશન કરીને અને જે તારીખ ફાળવી હોય તેજ તારીખે દર્શન કરવા શ્રદ્ધાળુઓ આવે. ત્યારે હવે ઋષિકેશ અને હરિદ્વારમાં દર્શન માટે રજિસ્ટ્રેશનને લઇને મહત્વનો નિર્ણય લીધો છે.
ઓફલાઇન રજિસ્ટ્રેશન બંધ
અધિકારીઓએ જણાવ્યું કે હરિદ્વાર અને ઋષિકેશમાં ઓફલાઇન રજિસ્ટ્રેશન બંધ કરી દેવામાં આવ્યું છે જ્યારે ઓનલાઇન રજિસ્ટ્રેશન પછી જ શ્રદ્ધાળુઓ ચારધામના દર્શન કરવા જઇ શકશે.
ચારધામ જનારા યાત્રીઓને સલાહ
ચારધામ યાત્રા પર જનારા યાત્રીઓને અપીલ કરવામાં આવી છે કે રજીસ્ટ્રેશન કર્યા બાદ જ પ્રવાસ પર આવવા વિનંતી કરવામાં આવી છે. એડવાઈઝરી જણાવે છે કે જો તેઓ નોંધણી વગર આવે છે, તો તેમને 'બેરિયર' અથવા 'ચેક પોઈન્ટ' પર રોકવામાં આવી શકે છે અને આનાથી તેમને ભારે અસુવિધાનો સામનો કરવો પડી શકે છે. યાત્રિકોને એવી પણ સલાહ આપવામાં આવી છે કે રજીસ્ટ્રેશન કર્યા બાદ તેઓ નિર્ધારિત તારીખે જ યાત્રા પર આવે અને જે ધામ માટે તેઓએ રજીસ્ટ્રેશન કરાવ્યું હોય તે જ રૂટ પર જવું જોઈએ. એડવાઈઝરીમાં, યાત્રાનું સંચાલન કરતી 'ટૂર એન્ડ ટ્રાવેલ' એજન્સીઓને એ પણ સુનિશ્ચિત કરવા માટે કહેવામાં આવ્યું છે કે મુસાફરોએ નોંધણી કરાવી છે કે નહીં અને શ્રદ્ધાળુઓને લઈ જતા પેસેન્જર વાહનને 'ટ્રીપ કાર્ડ' આપવામાં આવ્યું છે કે કેમ.
ફેક રજિસ્ટ્રેશન અંગે કાર્યવાહી
તો બીજી તરફ વધી રહેલા ફેક રજિસ્ટ્રેશનને લઇને સરકારે લાલ આંખ કરી છે. રજિસ્ટ્રેશન અંગે કડક તપાસ કરવામાં આવી રહી છે. જે દરમિયાન રૂદ્રપ્રયાગ પોલીસે તપાસ દરમિયાન મળી આવેલા નકલી રજિસ્ટ્રેશનના 9 કેસમાં એફઆઈઆર નોંધી છે. આ કેસોમાં નકલી નોંધણી પર કેદારનાથ યાત્રા પર આવવાના અને પછીની તારીખો માટે નોંધણીમાં છેતરપિંડી કરીને મેની તારીખ દર્શાવવાના કેસનો સમાવેશ થાય છે.
છેતરપિંડી કરનાર સામે કરાશે કાર્યવાહી
રુદ્રપ્રયાગના પોલીસ અધિક્ષક વિશાખા અશોક ભદાનેએ જણાવ્યું કે બુધવારે કોતવાલી રુદ્રપ્રયાગમાં આ સંદર્ભે 9 કેસ નોંધવામાં આવ્યા છે. તેમણે કહ્યું કે તપાસમાં બહાર આવ્યું છે કે હરિદ્વાર અને ઋષિકેશમાં કેટલીક 'ટૂર એન્ડ ટ્રાવેલ્સ' એજન્સીઓ અને અન્ય લોકોએ આ લોકોને બનાવટી નોંધણી કરાવી છે. તેમણે કહ્યું કે આવા લોકોની માહિતી લેવામાં આવી છે. પોલીસ અધિકારીએ કહ્યું કે ટૂંક સમયમાં આ કેસોની તપાસ કરવામાં આવશે અને નોંધણીની છેતરપિંડીમાં સામેલ લોકો સામે કાર્યવાહી કરવામાં આવશે.
