Jitin Prasad Accident: માર્ગ અકસ્માતમાં થયા ઇજાગ્રસ્ત,કાફલાની કાર સાથે અથડાઇ મંત્રીની ગાડી

• જિતિન પ્રસાદ માર્ગ અકસ્માતમાં ઇજાગ્રસ્ત
  
• પોતાના સંસદીય વિસ્તારના પ્રવાસે હતા
• તેમની કાર અન્ય કારને અથડાતા ઇજાગ્રસ્ત

કેન્દ્રીય મંત્રી અને સાંસદ જિતિન પ્રસાદ રોડ અકસ્માતમાં ઇજાગ્રસ્ત થયા હોવાનું સામે આવ્યું છે. તેઓ તેમના સંસદીય ક્ષેત્ર પીલીભીતના પ્રવાસે હતા. આ દરમિયાન મંત્રીની કાર કાફલામાં ચાલી રહેલા વાહન સાથે અથડાઈ હતી. જિતિન પ્રસાદની સાથે રસોઈયા અને ખાનગી સચિવ પણ ઇજાગ્રસ્ત થયા છે.

સામાન્ય ઇજા થઇ

માર્ગમાં ક્ષતિગ્રસ્ત થયેલા વાહનને કેન્દ્રીય મંત્રી સ્થળ પર છોડી અન્ય વાહનમાં કાર્યક્રમ માટે રવાના થયા હતા.આ ઘટના મજોલા-વિજતી રોડ પર સ્થિત બહરુઆ ગામમાં બની હતી. જિતિન પ્રસાદને માથામાં સામાન્ય ઈજા થઈ છે. કાફલાની કાર ખૂબ જ સ્પીડમાં હતી, જેના કારણે જોરદાર ટક્કર થઈ હતી અને કારને ખૂબ નુકસાન થયું હતું.

મંત્રીની કારને કેવી રીતે ટક્કર થઈ?

મહત્વનું છે કે વાસ્તવમાં કેન્દ્રીય મંત્રી જિતિન પ્રસાદ પોતાના સંસદીય ક્ષેત્રના પ્રવાસે હતા. આ દરમિયાન તેમના કાફલામાં સામેલ એસ્કોર્ટ કારે અચાનક બ્રેક લગાવી અને જિતિન પ્રસાદની કાર પણ થંભી ગઈ પરંતુ પાછળથી આવતી કાર પોતાનું સંતુલન જાળવી ન શકી અને તેમની કારને ટક્કર વાગી હતી. પરિણામે કારમાં બેઠેલા લોકોને એકદમ આંચકો વાગતા સામાન્ય ઇજા થઇ હતી.

પૂરગ્રસ્ત વિસ્તારોની મુલાકાત

જિતિન પ્રસાદ પૂરથી પ્રભાવિત ગામો અને વિસ્તારોની મુલાકાત લેવા તેમના સંસદીય મતવિસ્તાર પહોંચ્યા હતા. કાફલામાં ભાજપના જિલ્લા અધ્યક્ષ સંજીવ પ્રતાપ સિંહ, એમએલસી સુધીર ગુપ્તા અને ધારાસભ્ય પ્રકાશ નંદના વાહનો પણ સામેલ હતા. તાજેતરમાં ભારે વરસાદ પછી આવેલા પૂરે આ વિસ્તારના ઘણા ગામોને ઘેરી લીધા હતા, ત્યાં જનજીવન ખોરવાઈ ગયું હતું.