- કારસેવક શ્રીકાંત પૂજારીને કોર્ટમાંથી મળી રાહત
- 31 વર્ષ જૂના કેસમાં કરવામાં આવી હતી ધરપકડ
- 29 ડિસેમ્બરે ધરપકડ કરાતા ભાજપે કર્યો હતો વિરોધ
અયોધ્યામાં રામ મંદિરના નિર્માણ અને મંદિરમાં પ્રાણ પ્રતિષ્ઠા કરવાની તૈયારીઓ પૂરજોશમાં ચાલી રહી છે. ત્યારે હુબલીની પ્રથમ વધારાની જિલ્લા સત્ર અદાલતે રામ જન્મભૂમિ આંદોલન દરમિયાન 31 વર્ષ જૂના કેસમાં ધરપકડ કરાયેલા કાર સેવક શ્રીકાંત પૂજારીને શરતી જામીન મંજૂર કર્યા છે. મળતી માહિતી અનુસાર હાલ તેઓને મુક્ત કરવામાં આવ્યા નથી. કેટલાક કારણોસર તેઓને શનિવારે મુક્ત કરવામાં આવશે.
શ્રીકાંત પૂજારીને શરતી જામીન મળ્યા
કર્ણાટકના હુબલીમાં સેશન્સ કોર્ટે શુક્રવારે 'કારસેવક' શ્રીકાંત પૂજારીને જામીન આપ્યા છે. શ્રીકાંત એક હિંદુ કાર્યકર્તા છે જેની પોલીસે ગયા અઠવાડિયે ડિસેમ્બર 1992માં નોંધાયેલા રમખાણોના કેસમાં ધરપકડ કરી હતી. આ ધરપકડના વિરોધમાં ભારતીય જનતા પાર્ટીએ ગુરુવારે રાજ્યના ઘણા ભાગોમાં પોતાનો વિરોધ ઉગ્ર બનાવ્યો હતો અને 'હું પણ કારસેવક છું, મારી પણ ધરપકડ કરો' નામનું અભિયાન ચલાવ્યું હતું. તેમની મુક્તિ માટે ભાજપ તરફથી પણ માંગ કરવામાં આવી હતી.
શું હતો આરોપ ?
શ્રીકાંત પૂજારીના વકીલના જણાવ્યા અનુસાર કોર્ટે તેમને શરતી જામીન આપ્યા છે. તે શનિવારે સાંજ સુધીમાં જેલમાંથી બહાર આવી જશે. તેમણે કહ્યું કે, અમે કોર્ટના નિર્ણયનું સ્વાગત કરીએ છીએ. 51 વર્ષીય શ્રીકાંત પૂજારી કર્ણાટકના ચન્નાપેટનો રહેવાસી છે. અયોધ્યામાં બાબરી ધ્વંસ બાદ હુબલીમાં પણ રમખાણો થયા હતા. શ્રીકાંત પર રમખાણો ભડકાવવાનો અને પછી તેમાં ભાગ લેવાનો આરોપ છે. તે સમયે કેટલીક દુકાનોને પણ આગ ચાંપી દેવામાં આવી હતી.
સરકારી વકીલે મુક્તિ સામે દલીલો કરી હતી
સરકારી વકીલે પૂજારીની મુક્તિ સામે દલીલો કરી હોવાનું જાણવા મળે છે. ફરિયાદ પક્ષે કોર્ટમાં દલીલ કરી હતી કે આરોપી શ્રીકાંત પૂજારી 31 વર્ષથી ફરાર છે અને તેને જામીન ન આપવા જોઈએ. જો કે, આરોપીના વકીલે કહ્યું કે પૂજારી છેલ્લા 40 વર્ષથી એક જ સરનામે રહેતો હતો અને તેણે કોર્ટનો સંપર્ક કર્યો હતો અને તેની સામેના કેસમાં જામીન મેળવ્યા હતા અને પોલીસ સમક્ષ પણ હાજર થયા હતા.
ધરપકડ ક્યારે થઈ?
મહત્વનું છે કે શ્રીકાંત પૂજારીની ગયા વર્ષે 29 ડિસેમ્બરે ધરપકડ કરવામાં આવી હતી, જે બાદ વિવાદ સર્જાયો હતો. પૂજારી શ્રીકાંતની ધરપકડ બાદ, કર્ણાટક ભાજપે તેની ધરપકડની નિંદા કરી હતી, રાજ્યભરમાં શ્રેણીબદ્ધ વિરોધ શરૂ કર્યો હતો. ભાજપે પણ તેમની મુક્તિની માંગ સાથે ઝુંબેશ શરૂ કરી હતી.
ભાજપે કર્યો હતો વિરોધ
ભાજપનું કહેવું છે કે કોંગ્રેસ સરકાર હવે રામભક્તો અને કાર સેવકોને ડરાવવાની રણનીતિ અપનાવી રહી છે. જ્યારે હિન્દુ કાર્યકર્તાઓને ગુનેગાર ગણાવવામાં આવી રહ્યા છે. તેમનું કહેવું છે કે શ્રીકાંત વિરુદ્ધ ઘણી વખત નકલી કેસ નોંધવામાં આવ્યા હતા જેમાં તે નિર્દોષ છૂટી ગયો હતો.
