મનીષ સિસોદિયાને રાહત નહીં, CBI કોર્ટે જામીન અરજી ફગાવી દીધી

• એકસાઇઝ પોલિસી કેસમાં CBI કોર્ટે અરજી ફગાવી 
  
• સિસોદિયા CBIના ભ્રષ્ટાચાર અને ઈડીના મની લોન્ડરિંગ કેસમાં ન્યાયિક કસ્ટડી હેઠળ જેલમાં
• સિસોદિયા નીચલી કોર્ટના ચુકાદાની વિરૂદ્ધ હાઇકોર્ટમાં અપીલ કરશે

એક્સાઇઝ પોલિસી કૌભાંડ સંબંધિત CBI કેસમાં દિલ્હીના ભૂતપૂર્વ નાયબ મુખ્યમંત્રી મનીષ સિસોદિયાની જામીન અરજી રાઉઝ એવન્યુ ખાતેની વિશેષ CBI કોર્ટે ફગાવી દીધી છે. સ્પેશિયલ જજ એમ કે નાગપાલે અરજીને ફગાવી દેવાનો નિર્ણય સંભળાવ્યો હતો.

સીબીઆઈ અને સિસોદિયાના પક્ષની દલીલો સાંભળ્યા બાદ કોર્ટે 24 માર્ચે પોતાનો ચુકાદો અનામત રાખ્યો હતો. સિસોદિયા હાલમાં સીબીઆઈના ભ્રષ્ટાચાર અને ઈડીના મની લોન્ડરિંગ કેસમાં ન્યાયિક કસ્ટડી હેઠળ જેલમાં છે. મનીષ સિસોદિયા નીચલી કોર્ટના ચુકાદાની વિરૂદ્ધ હાઇકોર્ટમાં અપીલ કરશે તેવી માહિતી સામે આવી છે.  દિલ્હીની સ્પેશયલ કોર્ટે કેસમાં સિસોદિયાની જામીન અરજી રદ કરી દીધી છે. સિસોદિયાની ન્યાયિક કસ્ટડી 5મી એપ્રિલના રોજ પૂરી થઇ રહી છે.

સીબીઆઈની દલીલ પહેલા પૂર્વ ડેપ્યુટી સીએમ મનીષ સિસોદિયાએ ટ્રાયલ કોર્ટમાં તેમની જામીન અરજીની સુનાવણી દરમિયાન કહ્યું હતું કે તેમને કસ્ટડીમાં રાખવાથી સીબીઆઈનો હેતુ પૂરો થશે નહીં. આ કેસમાં તમામ રિકવરી થઈ ચૂકી છે. સિસોદિયાએ કહ્યું હતું કે, 'મેં સીબીઆઈની તપાસમાં સંપૂર્ણ સહકાર આપ્યો હતો. જ્યારે તેમણે બોલાવ્યો ત્યારે તેમની પાસે હાજર થયો હતો.

તેમણે પોતાની જામીન અરજીમાં એવું પણ ટાંક્યું હતું કે જાહેર જીવનમાં સક્રિય હોવાને કારણે તે સમાજમાં ઊંડા મૂળ ધરાવે છે. તેને ધ્યાનમાં રાખીને તેઓ જામીન મેળવવા માટે હકદાર છે.