સુપ્રીમ કોર્ટ પહોંચ્યા મનીષ સિસોદિયા, CBIની તપાસ-ધરપકડને આપ્યો પડકાર

• કોર્ટે સિસોદિયાને 5 દિવસ માટે CBI કસ્ટડીમાં મોકલી દીધા છે
  
• સીબીઆઈએ મનીષ સિસોદિયાને સોમવારે રાઉઝ એવન્યુ કોર્ટમાં રજૂ કર્યા હતા
• CBIએ મનીષ સિસોદિયાની પૂછપરછ શરૂ કરી છે

દિલ્હીના ડેપ્યુટી સીએમ મનીષ સિસોદિયાએ સુપ્રીમ કોર્ટમાં અરજી કરી છે. સિસોદિયાએ SCમાં દારૂ કૌભાંડ કેસમાં તેમની ધરપકડ અને CBI તપાસની રીતને પડકારી છે. સુપ્રીમ કોર્ટ સિસોદિયાની અરજી પર ટૂંક સમયમાં સુનાવણી કરવા સંમત થઈ છે. આ મામલે આજે બપોરે 3.30 કલાકે સુનાવણી થશે.

મનીષ સિસોદિયાની દિલ્હી સરકારની દારૂ નીતિમાં કથિત કૌભાંડના સંબંધમાં રવિવારે CBI દ્વારા ધરપકડ કરવામાં આવી હતી. સીબીઆઈએ તેમને સોમવારે રાઉઝ એવન્યુ કોર્ટમાં રજૂ કર્યા હતા. કોર્ટે સિસોદિયાને 5 દિવસ માટે CBI કસ્ટડીમાં મોકલી દીધા છે.

સિસોદિયાની પૂછપરછ શરૂ

CBIએ મનીષ સિસોદિયાની પૂછપરછ શરૂ કરી છે. સીબીઆઈએ સિસોદિયા માટે પ્રશ્નોની લાંબી યાદી તૈયાર કરી છે. સિસોદિયાની ધરપકડ બાદ તપાસ એજન્સી પહેલીવાર તેમની પૂછપરછ કરી રહી છે. કહેવામાં આવી રહ્યું છે કે સીબીઆઈ નવેસરથી પૂછપરછ કરશે. અગાઉની પૂછપરછ દરમિયાન જે સવાલોના જવાબ આપવાનું ટાળ્યું હતું તેમને આ સવાલો ફરીથી પૂછવામાં આવશે.

AAP અને BJP આમને-સામને

સિસોદિયાને સોમવારે રાઉઝ એવન્યુ કોર્ટમાં રજૂ કરવામાં આવ્યા હતા. આ દરમિયાન, સીબીઆઈએ કોર્ટમાં દલીલ કરી હતી કે સિસોદિયા તપાસમાં સહકાર આપી રહ્યા નથી, તેથી કસ્ટોડિયલ પૂછપરછની જરૂર છે. જેને સ્વીકારીને કોર્ટે સિસોદિયાને 5 દિવસના CBI રિમાન્ડ પર મોકલી દીધા છે.

બીજી તરફ સિસોદિયાની ધરપકડ બાદ આમ આદમી પાર્ટીએ દિલ્હી સહિત સમગ્ર દેશમાં જોરદાર વિરોધ કર્યો હતો. આમ આદમી પાર્ટી આરોપ લગાવી રહી છે કે દિલ્હીમાં શિક્ષણ ક્ષેત્રે ઉત્તમ કામ કરનારા સિસોદિયાને ભાજપ સરકાર ખોટા આરોપમાં ફસાવી રહી છે. આ સાથે જ ભાજપે સિસોદિયાને લાંચ લેનારા ગણાવ્યા છે.