બુધવારની સવાર મહારાષ્ટ્ર માટે ચોંકાવનારી ઘટના બની ગઈ, જ્યારે બારામતી એરપોર્ટ નજીક એક ખાનગી ચાર્ટર્ડ વિમાન દુર્ઘટનાગ્રસ્ત થયું હોવાના અહેવાલો સામે આવ્યા. આ વિમાનમાં NCP નેતા અને મહારાષ્ટ્રના નાયબ મુખ્યમંત્રી અજિત પવાર મુસાફરી કરી રહ્યા હતા તેવી માહિતી પ્રાથમિક રીતે સામે આવી છે. જોકે, ઘટનાને લઈને અધિકૃત સ્તરે હજુ તપાસ ચાલુ છે.
માહિતી અનુસાર મુંબઈથી બારામતી તરફ રવાના
મળતી માહિતી મુજબ, અજિત પવાર મુંબઈથી બારામતી તરફ રવાના થયા હતા. તેઓ બારામતીમાં ચૂંટણી પ્રચાર અને સ્થાનિક કાર્યક્રમોમાં ભાગ લેવા જઈ રહ્યા હતા. વિમાન નિયમિત રીતે ઉડાન ભરી હતી અને શરૂઆતમાં કોઈ અસામાન્ય સ્થિતિ જોવા મળી નહોતી.
લેન્ડિંગ દરમિયાન બગડ્યું સંતુલન
જ્યારે વિમાન બારામતી એરપોર્ટ પર લેન્ડિંગ માટે નીચે ઉતરતું હતું, ત્યારે અચાનક પરિસ્થિતિ બગડતી દેખાઈ. એર ટ્રાફિક કંટ્રોલ સાથે છેલ્લી વાતચીત દરમિયાન પાઇલટે ટેક્નિકલ સમસ્યાની આશંકા વ્યક્ત કરી હતી હોવાના અહેવાલો છે. કેટલાક સૂત્રો મુજબ, વિમાનનું સંતુલન બગડ્યું હતું અને રનવે પર યોગ્ય રીતે ઉતરી શક્યું નહોતું.
આગ અને ભારે નુકસાન
લેન્ડિંગ પ્રયાસ દરમિયાન વિમાન જમીન સાથે અથડાયું અને તેમાં આગ લાગી. દુર્ઘટના બાદ વિમાન સંપૂર્ણપણે બળી ગયું હોવાનું જણાવવામાં આવ્યું છે. ઘટનાસ્થળે તાત્કાલિક ફાયર બ્રિગેડ અને બચાવ ટીમો પહોંચી ગઈ હતી અને રાહત કાર્ય શરૂ કરવામાં આવ્યું હતું.
પ્રશાસનની પ્રતિક્રિયા
બારામતી ગ્રામિણ પોલીસના અધિકારીઓએ જણાવ્યું કે દુર્ઘટનાના કારણોની તપાસ કરવામાં આવી રહી છે. ટેક્નિકલ ખામી, હવામાન, અથવા માનવીય ભૂલ – ત્રણેય પાસાઓ પરથી તપાસ થશે. DGCA અને અન્ય એવિએશન એજન્સીઓ પણ આ મામલે રિપોર્ટ તૈયાર કરશે.
અંતિમ સત્ય શું છે?
હાલમાં સૌથી મોટો પ્રશ્ન એ છે કે વિમાન દુર્ઘટના પહેલા સાચે શું થયું હતું? પ્રાથમિક માહિતી મુજબ લેન્ડિંગ સમયે ટેક્નિકલ ખામી મુખ્ય કારણ હોઈ શકે છે, પરંતુ અધિકૃત તપાસ બાદ જ સંપૂર્ણ સત્ય સામે આવશે. પ્રશાસને લોકોને અફવાઓથી દૂર રહેવા અને અધિકૃત માહિતી પર જ વિશ્વાસ રાખવાની અપીલ કરી છે. આ ઘટના રાજ્યની સુરક્ષા વ્યવસ્થા અને VIP મુસાફરી માટે વપરાતા વિમાનોની સલામતી પર પણ ગંભીર પ્રશ્નો ઊભા કરે છે.
આ પણ વાંચો : Ajit Pawar political profile : 9 વખત નાયબ મુખ્યમંત્રી બન્યા, જાણો તેમની રાજકીય સફર
