BSNLનું થશે ખાનગીકરણ? સરકારે કરી આ મોટી જાહેરાત

કેન્દ્ર સરકારની ટેલિકોમ કંપની BSNLને લઈ લાંબા સમયથી ચાલતી અફવા હવે પૂર્ણ થઈ ગઈ છે. કેન્દ્રીય મંત્રી જ્યોતિરાદિત્ય સિંધિયાએ સ્પષ્ટ કર્યું છે કે BSNLનું ખાનગીકરણ થવાનું નથી. સરકારનું મુખ્ય ફોકસ કંપનીને મજબૂત બનાવવાનું અને તેની સર્વિસને વિસ્તૃત કરવા પર છે. 4G અને 5G નેટવર્ક દ્વારા BSNLને નવી શક્તિ આપવામાં આવશે.

4Gથી 5G સુધી સ્વદેશી ટેકનોલોજી પર ભાર મૂકાયો

સિંધિયાએ લોકસભામાં જણાવ્યું કે BSNL દેશના નાગરિકોની સંપત્તિ છે અને તેનો ઉદ્દેશ્ય જનતાની સેવા કરવાનો છે. સરકાર BSNLને વેચવાની જગ્યાએ તેને મજબૂત બનાવવાની પરાક્રમશીલ યોજના બનાવી રહી છે. વડાપ્રધાન નરેન્દ્ર મોદીના નેતૃત્વ હેઠળ કંપનીને નવી દિશા આપવાનું આયોજન ચાલી રહ્યું છે. 4Gથી 5G સુધી સ્વદેશી ટેકનોલોજી પર ભાર મૂકાયો છે. વિદેશી કંપનીઓ પાસેથી સાધનો ખરીદવાને બદલે, ભારત પોતાની ટેકનોલોજી વિકસાવવા પર ધ્યાન કેન્દ્રિત કરી રહ્યું છે.

આ નિર્ણયથી ભારત ટેલિકોમ સાધનો બનાવતા દેશોમાં સ્થાન મેળવી શકે છે. હાલ BSNL 4G નેટવર્કને મજબૂત કરવા પર કામ કરી રહ્યું છે, ત્યારબાદ 5G રોલઆઉટ માટે તૈયારી થશે. તાજેતરના રિવાઈવલ પેકેજ દ્વારા BSNLની સ્થિતિમાં મહત્વપૂર્ણ સુધારો થયો છે. આ પેકેજમાં 3.22 લાખ કરોડ રૂપિયાના નાણાકીય સહાય, સ્પેક્ટ્રમ ફાળવણી અને ઈન્ફ્રાસ્ટ્રક્ચર રોકાણ જેવા પગલાં શામેલ છે. કંપનીને ફરીથી સ્થિર કરવાની કામગીરી સફળ રહી છે.

કેટલી છે BSNLના ગ્રાહકોની સંખ્યા?

BSNLનું નેટવર્ક ઝડપી ગતિએ વિસ્તર્યું છે. ગ્રાહકોની સંખ્યા 8.55 કરોડથી વધીને 9.27 કરોડ થઈ ગઈ છે. ફેબ્રુઆરી 2026 સુધી 97,000થી વધુ 4G સાઇટ્સ સ્થાપિત થઈ ચૂકી છે. સાથે જ, BharatNet હેઠળ ગામડાઓ સુધી ઓપ્ટિકલ ફાઇબર પહોંચાડવા માટે 1.39 લાખ કરોડ રૂપિયાની યોજના અમલમાં છે, જે દેશમાં ડિજિટલ કનેક્ટિવિટીને મજબૂત બનાવશે.

આ પણ વાંચો : PM મોદીએ કુવૈતના પ્રિન્સ શેખ સબાહ અલ-ખાલિદ સાથે કરી વાત, ઈદના તહેવારની શુભેચ્છા પાઠવી